2020-02-05

5.5K

武漢肺炎肆虐!產檢唔敢去 孕婦出入醫院等同搵命博?

武漢肺炎!武漢肺炎!武漢肺炎!相信大家最近對呢四個字絕對唔陌生,呢邊廂撲口罩,那邊廂搵消毒用品,比你上網咁好彩見到仲有貨?可惜各大超巿物流都已經不勝負荷跪低晒,根本連落單機會都無!睇見確診數字每日咁升,但又無辦法完全做好防疫,真係每單相關新聞都觸動到媽媽們嘅防疫神經,連情緒都變得好崩緊,真係好難想像呢一刻臨盤在即嘅媽媽們,仲要出入屬於高危地帶嘅醫院、診所應該點算好。

討論區熱話:今日要去Qe普通產檢 ...
討論區熱話: 公立醫院產檢

近日都見好多大緊肚嘅JM顯得相當無助,喺討論區紛紛講緊:「老公仲有無得陪產?」、「去唔去政府醫院產檢好?」、「臨時轉私家生應該點做?」等等,其實依家疫情幾乎每秒都有新發展,醫生都無辦法答到你下個安排會係點,所以有關仲有無得陪產問題,可能都係要生嗰秒先知,媽媽們或者會覺得徬徨、失望同感到可惜,但都實在無計,咁既然係控制唔到,不如放輕心情,唔好畀壞情緒搵上門,始終BB同自己安全健康先係最重要嘛(真係講就容易,但都盡量放鬆啦);至於臨時轉私家生呢個問題,就要視乎價錢同醫生時間表,最好都係打去相關醫院問問就最快可以獲安排喇!

更多文章:【武漢肺炎】孕婦注意!各大私院入院特別措施及安排
更多文章:【BKmall防疫組合】母嬰適用除菌消毒噴霧 新手媽媽居家出門必備

更多文章:【武漢肺炎】增強孩子抵抗力!5個媽媽必學食譜

而講到最後,其實仲有啲孕婦係必須硬住頭皮去政府醫院進行產檢,有排過政府產檢都會知,錯過咗一次產檢,就唔知下次排期日子同時間,仲隨時會影響到安排入院生B事宜,如果你有擔心今日唔想去?惟一只可以打電話去改延期一星期,咁其實又避得幾耐呢?喺呢個無得揀嘅情況下,有唔少JM最後都選擇冒死去咗做檢產......

「有去呀!我去(QE)L座入大樓,只係量體溫,同埋見醫生比平時仲快喎!」

「我前日去咗瑪麗呀,寧願而家去好過再過兩星期,係呢個病毒喺香港嘅高風期先去喎!」

「我都係去聯合啊,冇事喎,一入門口量體溫同叫你用消毒酒精消毒雙手,裡面全部人都有戴口罩。 」

「剛剛去完廣華做產檢。由入大門一刻已經要檢查體溫,一定要戴口罩先可以入去。上到去婦產科樓層,陪診者要填form ,再用消毒酒精消毒雙手。另外,會限制陪診者入去。所以除左孕婦之外,如無必要,都唔好叫老公或家人陪產檢了。」

討論區熱話:今日要去Qe普通產檢 ...
討論區熱話: 公立醫院產檢

喺呢個時候,其實已經有太多狀況係唔到我哋選擇,講得老土啲,每人面對嘅情況都唔同,唔去政府生咪唔使去產檢?咁又係咪人人可以負擔得到?你想去,屋企人又叫你唔好去?咁佢哋係咪有透視眼同醫生嘅專業知道BB安好?

為母則強?面對徬徨無助,仲要頂硬上嘅局面,咁嘅心情確實唔係人人可以理解,喺呢刻真係就算再強,都被無力感重重包圍,所以希望大家都可以多啲關心下身邊嘅孕婦們,就算幫唔到,都可以聽佢哋呻下,嘗試聽下佢哋所憂心嘅事,比啲支持佢哋啦!

更多文章:【武漢肺炎】停課也可在家學習!推介3個免費網上學習平台!
更多文章:【武漢肺炎】新型冠狀病毒殺到!呼吸系統醫生提出12個注意事項

【編按:以上內容為作者之個人意見及立場】

相關文章

疫症下的生仔經!JM分享公立醫院最新生B安排

武漢肺炎——醫生教你抗疫小貼士!【孕婦+初生BB篇】

【武漢肺炎】孕婦注意!各大私院入院特別措施及安排

【二寶孕記】第二次QE產檢分享 - 早期唐氏篩查

緊貼武漢肺炎最新相關資訊