【婆媳共融大法】向家嘈屋閉說不！老公先能解決婆媳糾紛

地球上，新抱同奶奶可謂最不能共存嘅生物物種（當然有例外）！成日都聽人講婆媳糾紛，甚至遇到變態奶奶。特別係同住嗰啲，有時真係好慘、好折磨。到底奶奶們係咪都太得閒呢？一句說話講10000次，唔同住嗰啲就次次見到個孫都同佢講：嫲嫲，嫲嫲，叫聲嫲嫲啦！無論個孫幾多歲都係呢句對白，唔叫、叫唔出就係無禮貌，唔理佢啱啱瞓醒，定3000年無見，抑或其實呢......佢未識講嘢！對眼真係反出宇宙！

查實人與人之間相處嘅態度係相對架啫，成日聊交嗌就唔怪得人哋唔想理佢。同埋下下大大力咬埋嚟，自己都辛苦架？！

Forum都經常見到同奶奶相處唔嚟嘅個案，唔同老公講又屈死自己，講又怕家嘈屋閉，唯有上Forum取吓暖囉！之不過當遇到婆媳問題嘅時候，又應該點衡量同唔同另一半分享呢？

話說朋友個奶奶一日到黑拉埋個老爺都走上佢屋企，又話亂又剩，仲成日囉囉嗦嗦，問「你呢件衫著唔著」，「呢件係咪唔著，不如唔要就比我」；食飯嗰陣就畀晒說話佢聽，大聲同個仔講：「阿邊個個仔搵好多錢，人哋屋企好整齊，你知唔知點解你儲唔到錢？風水佬話屋企整齊先聚到財！」

最慘我朋友係home office，有時不修邊幅坐喺屋企都唔好話唔尷尬，仲要老一輩真係唔明咩係home office，完全覺得我朋友大食懶咁，使晒佢個仔啲錢！

其實要解決嚴重嘅婆媳糾紛，作為中間人嘅老公／阿仔或者真係要出啲計仔，其中一個dislike嘅處理方法就係兩邊瞞，過咗海就神仙。過唔到就霸王硬上弓，迫個老婆就範，再賴返個阿媽，講咩：「佢老人家你就下佢！」令到誤會加深，關係愈來愈差，跌入黑暗嘅無限輪迴！

所想婆媳共融，首先個老公應該要做返個真‧男人！

入嚟討論區一齊傾