2016-12-23

15.8K

【懷孕日記】晴朗在肚子裡的十個月(一)-首12周

20161223_pregnant01

懷胎十月,係每個媽媽最期待,或者係最回味嘅事情。回想起晴朗響我肚裡面嘅時間,會因身體變化帶來嘅不適而感到困苦,但又會為BB在肚內一天一天長大而滿心歡喜。

 

期待BB來臨嘅日子,真係百般滋味在心頭。就等我回一回帶,同大家分享一下懷孕過程。對於正準備懷孕或正在懷孕中嘅媽媽可以作多個參考呀!

 

一切就從一支驗孕棒開始……

1147536502_m

 

**由於以下落嚟嘅記錄包括咗兩胎嘅經歷,我會將陀住朗朗 (哥哥,2010年出生,現時6歲7個月)嘅回憶highlight為藍色,而晴晴(妹妹,2012年出生,現時4歲10個月)嘅就用粉紅色標示。等大家睇得容易啲啦!**

 

科技先進,而家驗孕棒已經發展到電子化喇!仲記得懷著晴晴嘅時候,懷孕兩周六天已經可以測試得到結果。驗孕棒上顯示我已經懷孕約3周,又真係幾準喎!大家可以記低「Clearblue」呢個牌子,我係響萬寧買㗎!屈臣氏或便利店都有售,唔難搵。

 

懷孕第4周

1147536206_m

好多時都聽到有啲大肚媽媽會投訴坐車無人讓座。但就係好邪!唔知係咪因為我著得比較鬆身嘅關係,未見肚就已經有人讓座畀我。不過都好多謝果位有心人士,大家如果見到大肚婆都記得要讓位喇!

 

懷孕第6周

1147537101_m

老公知道我「恨」生女「恨」到暈,所以送咗份小禮物畀我。粉紅色嘅BB襪仔,襯晒囡囡啦!

 

1147537201_m

口味開始會有轉變。陀梗朗朗嘅時候,去親飲茶都好鍾意食鳳爪,但以前我唔會食㗎!亦都唔會食麥記、杯麵、公仔麵等無益食物。但有咗後竟然食得多咗,仲成日心思思想再食添!(陀仔比較鍾意食咸嘢,又鍾意香口嘅食物)

 

1147536305_m

到陀晴晴果陣,調番轉好鍾意食酸辣米線,又鍾意食糖、朱古力之類。慘喇!仲唔肥屎我?(陀女較偏向酸、辣、甜嘅味道)

 

1147536602_m

懷孕初期,每星期都會去兩次糖水舖飲桑記生蛋茶,可以有助安胎。搵啲舊式啲嘅糖水舖就有㗎喇!

 

懷孕第7周

1147535805_m

響eBay訂咗部胎心機番嚟!咁就可以時時刻刻聽到BB心跳聲啦!不過太早聽唔到,唔好自己嚇自己,大概要16-20周先會聽得清楚啲。

 

1147536306_m

第一次去私家度照超聲波,扁扁哋膸圓形果個係胎囊,即係BB住嘅屋企。圓形果點係營養球,作用係為BB提供營養架!

 

1147537005_m

Zoom近啲個胎囊畀大家睇下,見唔見到晴晴呀?好模糊果個影就係晴晴喇!醫生正量度梗佢嘅長度。

 

懷孕第8周

1147537102_m

第一次同朗朗接觸係響第8周,黑色腰豆形呢個就係胎囊喇!胎囊裡面有一忽白色嘅影,係朗朗嚟呀!有1.55cm長。

 

1147595104_m

仲記得懷孕初期成日估BB係仔定女,所以都上網搵過一啲資料。資料顯示可以從7至10周嘅超聲波圖片估計出BB性別,方法係睇BB嘅胎囊形狀。如果胎囊長並呈腰豆狀就多數係仔,朗朗果幅超聲波又真係好似腰豆喎!如果較為圓扁型就係女,晴晴果幅的確唔似腰豆,係圓圓哋扁扁哋咁嘅。呢個方法幾有趣,但當然未經醫學證實啦!不過對於心急想知道係仔定女嘅媽媽嚟講,不仿參考一下。

 

懷孕第10周

1147537105_m

同老公行開汽車用品店一齊揀咗呢個裝飾掛響車度。車出車入都好似向全世界說:「我升呢成為大肚媽媽喇!」

 

1147535807_m

陀住晴晴第一次去健康院產檢,已經聽到胎心聲。健康院啲聽胎心儀器唔同私家果啲咁先進,一般無咁快聽到,朗朗果陣都無咁早。可能係第二胎嘅關係啦!當刻我同老公邊聽邊笑好開心呀!

 

懷孕第11周

1147535808_m

第2次同朗朗接觸,今次開始聽到心跳聲喇!強而有力嘅節拍!朗朗大個咗好多,上次先得1.55cm,今次有4.24cm喇!我問醫生BB幾時先會識得郁架?醫生話BB瞓梗覺,跟住醫生郁下我個肚,嘗試叫醒朗朗,真係醒咗喎!仲腳仔踢踢添!好精靈活潑呀!

 

1147536005_m

呢個表係mark住每日嘔嘅次數,由第8周開始嘔到而家。食咩嘔咩,嘔咗成個月真係有啲辛苦!相反陀住晴晴嘅時候有時係個胃頂住好辛苦,頂到好多胃氣,勁想嘔!但最終未嘔過。可能呢啲就係陀仔同女嘅分別啦!

 

1147537106_m

其實嘔都好需要能量,空肚嘔仲辛苦。呢啲就係陪住我度過嘔吐期嘅食物,寶礦力沖劑加溫水開嚟飲,感覺真係會好啲㗎!

 

懷孕第12周

1147534415_m

第一次半夜三間3點幾嚟食杯麵,無辦法!瞓瞓下覺真係好肚餓,BB都好大食喎!

 

1147535809_m

將有咗嘅消息通知公司,啲同事都戥我開心呀!仲走晒過嚟恭喜我,成朝都忙過不停接收祝賀。咁開心!下晝一於萬歲啦!

 

1147534414_m

陀晴晴嘅時候都有在宣佈喜訊後請下午茶,仲試咗sift出品嘅蛋糕同macaroon添!無令大家失望,好好味呀!

 

1147537009_m

要開始搽肚紋膏喇!唔知關唔關事,我個肚生完BB後真係無咩肚紋,仲見得人喎!想要靚真係唔懶得㗎!

 

相關閱讀:

【孕媽媽】瑪嘉烈22小時催生經歷分享

【孕媽媽】瑪嘉烈生第二胎經歷分享

 

【編按:以上內容為作者之個人意見及立場】

相關文章

人夫怨港元5000月子餐貴 偷偷退訂恨斥老婆「自以為大小姐」惹網民震怒

3歲前為嬰幼兒語言發展黃金期 認識10項致聽障高危因素

【親子急急問】孕婦注意!5大徵兆代表就快生 有便意感要特別留意

【營養師話你知】豬腳薑對產婦有補身作用?助改善手腳冰冷!

緊貼新冠肺炎最新相關資訊