小小豬病左成個星期，就冇乜點食成個星期，人仔都縮左成個碼，真係睇見我都超肉赤。
難得開始有返少少胃口，就當然即刻煲返啖湯佢飲，剛剛病好就不宜太進取(即係唔可以太補身)，所以就清清地煲返個合掌瓜無花果百合湯，簡簡單單咁同小小豬調理一下啦~
合掌瓜2個、粟米1枝、紅蘿蔔1個、新鮮百合2大個、無花果3粒、南北杏 2湯匙、豬骨$35~
合掌瓜洗淨去心後切件~
粟米及紅蘿蔔去皮洗淨切件~
鮮百合切去頭尾，剝開一瓣瓣，然後洗淨~
無花果洗淨剪開半，同南北杏一齊浸洗一陣~
豬骨汆水~
煲內放約3L水，隨水加入所有材料(新鮮百合除外)~
待滾起時，先用大火加蓋煲約15分鐘~
再轉慢火加蓋煲45分鐘~
依個時候就可以加入新鮮百合~
再以慢火煲30分鐘~
最後加少少鹽調味就飲得~
啖湯真係好清甜，所以食左幾日清啖食物嘅小小豬都開左少少胃口，乖乖飲左兩碗又食左好多粟米同紅蘿蔔，今餐足足係佢病嗰幾日嘅份量。見佢食得咁滿足，我都安心晒，係時候諗下整啲咩佢食，等佢補返消失的幾斤肉啦！
溫馨提示：
– 由於個別人士體質不同，所以大家記得煲之前了解下自己，如有疑問，請先向註冊中醫查詢！
