自家製作：黑糖鮮奶燉蛋

早排係網上見到有朋友仔介紹整黑糖鮮奶燉蛋，見個整法都幾簡單好似好易咁，所以今次又嚟試吓整啦！

材料就係需要：雞蛋2隻、熱滾水125g、黑糖45g、鮮奶125g！

先將雞蛋打勻備用！

鮮奶倒入蛋汁中拌勻！

再黑糖粉分四次加入滾水中，慢慢拌勻等黑糖溶化成為糖水！

糖水倒入蛋汁中拌勻！

然後放入碗內！

之後以中火蒸約十五分鐘！

話咁快就可以有得食啦！

雖然個表面就好似醜樣咗啲啲，我估用慢火嚟蒸，應該會好好多，下次等我改良吓先得！

不過入面嘅蛋蛋又真係好滑，而且唔算太甜，比起用冰糖好味好多又健康好多呀！

其實我都幾鐘意食燉蛋，不過廚藝唔太好，所以成功嘅機會率唔多，亦都因為咁我都係比較少整。有咗呢個成功嘅經驗，我可以成日整嚟食啦！