小小豬食緊啲乜食到咁開心興奮呀？哈哈！之唔係我自家制嘅好味椰汁糕！其實我真係好鐘意食椰汁糕，記得細細個次次去酒樓都一定會點依個甜品。不過依家好少酒樓有整純正嘅椰汁糕，所以都無食好耐啦！
早排見朋友仔係FACEBOOK整左，見個食譜咁簡單，加上又讚不絕口，所以又跟風整吓啦！
材料都真係非常簡單：魚膠粉12g、熱水200ml、椰漿400ml、花奶100ml、冰糖60g。
先將100ml熱水倒入魚膠粉內不停攪動直至魚膠粉完全融掉。
將冰糖放入另外100ml嘅熱水內煮，直至冰糖完全融掉，再熄火。
將椰漿、花奶加入已融掉的冰糖內攪勻，最後將已融掉之魚膠粉亦倒入攪勻。
用器皿盛起再放入雪櫃雪五小時左右便可食用。
絕對唔係賣花讚花香，依個自家椰汁糕真係堅好食，滑嘟嘟之餘仲一啲都唔甜，配埋個玫瑰花模，簡直係色香味都齊呀！
睇小小豬食得咁開心就知，佢一個人可以食晒成個玫瑰花呀！
依款椰汁糕就連平日唔多鐘意食甜品嘅大肥豬都讚好，真係幾有成功感呀！依個真係簡單易整又好味，所以一定會整多啲，等自己食得開心啲先得。
