早幾日喺Baby Kingdom有媽媽分享咗光波芝士波波嘅食譜，見都係唔難，所以今日就同小小豬嚟個親子廚房，等依個為食小小豬又得玩時又有得食嘛！
材料：糯米粉100g、芝士粉半樽、蛋1隻、牛油溶液1茶匙、牛奶70ml。
先將糯米粉篩一次。
之後就將芝士粉倒入糯米粉內攪勻，依個任務當然係交俾小小豬負責啦。
加雞蛋攪勻。
再加牛油溶液。
最後再加入牛奶。
之後就搓一陣，至到無粉粒就可以啦。
用保鮮紙包好放雪櫃三十分鐘。
三十分鐘後，就可以拎出嚟搓成一粒粒嘅波波。當然依個程序又係小小豬負責啦！因為可以畀佢參與整嘢食之外，係搓波波嘅過程都可以訓練一吓手仔小肌肉嘛。
搓完啦……雖然有啲就唔多似係波波型，似雞蛋多啲，不過都係出於小小豬手，所以都算靚啦！
放入光波爐以一百八十度焗十八分鐘。
等食嘅心急豬。
出爐啦！
近啲睇，個賣相真係好靚好吸引呀！
味道方面又點呢？大家睇小小豬食得咁興奮就知係好食啦！哈哈哈！
唔係讚自己，依個芝士波波真係幾好食，煙煙韌韌得嚟又整香芝士味，最好就係簡單方便又易整，又可以當係一個親子活動嘛！
嘉汶表妹仲話同出面某麵包店嘅係一樣，真係勁開心。等我有時間再整多幾轉，研究吓點整其他味道先。見大家食得開心時，我都會好有滿足感呢！
