2022-02-02

5.4K

【農曆新年】盤點農曆新年9大討厭行為 派利是最容易見到?

農曆新年係一家團聚,開開心心的日子。不過就有JM在討論區力數N宗喺新年期間遇到嘅討厭行為,一齊嚟傾吓究竟有幾黑人憎?以下9大案例轉自各JM留言,如有雷同,純屬巧合!

1. 新年限定的笑騎騎保安

平時見到佢就黑口黑面,新年期間就會前所未見咁熱情地幫你開門閂門;更亭平時得一個人睇,新年會「加強保安」,三、四個一齊來恭喜你發財,仲要日日輪流換保安,唔好諗住今日派咗利是聽日就免疫!

2. 新年才會約你飲茶的朋友(帶埋小朋友逗利是)

平日約佢,永遠無影;新年就會主動問你幾時得閒,知你無帶仔女,就會帶自己仔女來,逗利是之餘埋單仲要一人一半。為咗貪果幾百蚊而出賣自己人格,值得咩?

3. 打探私人的問題

「幾時結婚?」「幾時生仔?」「人工幾多?」喂,而家查家宅咩?其實呢啲嘢關你咩事?多過你又唔抵得;少過你又畀你串,想點先?!

4. 比較仔女成績、薪金

問你仔女近排點,然後開始講佢啲仔女的威水史,迫人讚佢。唔同人有唔同情況嘛,人比人,比死人!

5. 己所不欲而施於人的禮盒

將自己不想食的禮盒轉贈他人,有冇諗過收果個想唔想食?有JM索性講明唔使送禮,大家都唔使煩!有時老人家未必食到甜嘢,送超市禮券畀佢哋買柴米油鹽反而仲實際!

6. 同事帶仔女返公司周圍逗利是

有同事年年初四帶個囡返公司,入面有近200位同事,個囡由3歲逗利事到13歲!好多人都暗地裡恥笑佢仲會帶個女逗多幾多年?18歲?定大學畢業?做人要有廉恥,有啲嘢唔係要畀人話/犯法先代表有問題!都係果句,己所不欲而施於人!

7. 要同陌生親戚拜年

四大長老都好鐘意新年熱熱鬧鬧、濟濟一堂。JM總會唔知點解要見好多關係疏離的親戚,只會喺新年聯絡,仲要去拜訪你屋企,每年都要賣笑其實都會攰架。

8. 聲稱嫁了外國人不派利是,但仔女又要收利是

唔派利是冇問題,但點解又要接受人哋的好處?新年都係想大家開開心心啫,一係你就唔好收唔好派,為咗貪封利是又何必咁呢?

9.新年限定之熱情好客的酒樓樓面

平時叫佢落單就扮睇唔到,一到新年就笑到四萬咁口,唔同的樓面仲會每隔五分鐘走嚟會幫你斟茶遞水,服務非常周到。

以上幾樣行為,你又最討厭邊樣呢?


相關文章

【港識教養】不滿利是錢比妹妹少 12歲姐姐報警:想換爸媽

【派利是】女兒帶10名外孫回鄉拜年 外公派利是派到「懷疑人生」

【農年新年】8款賀年食品的由來!原來食年糕係為咗……

【農曆新年】不可以食粥、午睡?10大農曆新年傳統禁忌(內含新年禁說)

緊貼新冠肺炎最新相關資訊