2019-08-21

1.1K

【學童營養】「今日煮咩餸好?」子女午膳飯盒切忌放呢幾款食物!

小學生每星期留喺學校最少三十五個鐘,要數當中最開心同期待嘅時間莫過於喺午膳時間。家長平日煮飯已經夠曬頭痕:「今日煮咩餸好?」,諗住小朋友返咗學可以簡單啲,午餐選擇由午膳供應商提供嘅學校飯盒畀小朋友,點知又唔多啱佢哋口味,令唔少家長最後都係自備健康午餐「送飯」畀子女。

更多文章:【學童營養】各國小朋友午餐吃甚麼?
更多文章:【學童營養】飯盒夠營養嗎?不得不知孩子便當盒不可缺少的營養

要準備健康午餐並唔係易事,既要兼顧色香美味,飯同餸菜亦要符合健康午餐嘅黃金比例,令小朋友吸收到足夠營養。家長平日除咗多啲參考食譜,令餸菜款式多變外,更要儘量避免帶飯嘅食物「地雷」!

1. 豆類製品
豆腐、豆皮、豆漿等大部份新鮮豆類製品都無添加防腐劑,加上其蛋白質含量高,容易變壞,小朋友腸感又特別容易敏感,食後可能造成腸胃不適;特別係夏天,更應避免作為帶飯嘅菜式。

2. 半熟類
半熟類食物包括涼拌菜式、溫泉/半熟蛋、白切雞、非全熟牛扒等,呢啲食物本身喺製作過程中已經較易染上細菌,食用前亦未必會徹底加熱,變相無法徹底地殺死細菌;食後容易出現腹瀉、急性腸胃炎等情況。

3. 醬汁/芡汁/濃湯
不論係瑞士汁、茄汁、蒸魚汁、咖哩等醬汁都屬於高脂肪、高糖分、高鈉食物,以鮮奶或忌廉煮成嘅醬汁或濃湯,如:白汁、卡邦尼汁、粟米濃湯、忌廉湯等,情況更甚。小學生攝取過量脂肪、糖分、鹽分嘅食物,可增加超重、患肥胖症或其他不利健康嘅風險。

更多文章:【學童營養】學校小食部有乜食?零食都要食得有營!
更多文章:【學童營養】8款適合帶回校的兒童健康小食(內附詳細列表)

帶「隔夜餸」大忌有呢啲!
為咗節省功夫,唔少家長會以「隔夜餸」畀小朋友帶飯,咁就要注意避免帶以下食物啦!

1. 海鮮
俗稱「白肉」嘅海鮮含有大量蛋白質,例如:蟹、蝦等,相較於「紅肉」的確更為健康;但海鮮經反復加熱後,會產生蛋白質降解物,變得難以被蛋白酶分解,而且口感變差、腥味增加,最好都係即煮即食為妙!

2. 深綠色蔬菜
無可否認,深綠色蔬菜確實含有豐富維生素及礦物質,但大部份深綠色蔬菜都含有硝酸鹽,硝酸鹽經過加熱後,會代謝成致癌物——亞硝酸鹽,同時影響血液嘅帶氧能力。雖然少量亞硝酸鹽不足以致癌,但長期吸收,難免對身體構成危害。


相關文章

【學童營養】西式快餐=唔健康?一文教你準備健康西式午餐及小食

【學童營養】送飯家長必知!小學生健康午餐食物及黃金比例!

緊貼新冠肺炎最新相關資訊