2018-03-20

4.3K

【濕疹】過來人分享:BB 護理心得+皮膚科醫生 建議 & 預防方法

天氣係濕疹BB嘅最大敵人,冬天嘅時候超乾燥、而最近又潮濕又熱,都係引發濕疹嘅時候。

我哋嘅小寶貝和牛B,一出世嘅時候皮膚好滑,當滿月之後臉頰兩邊就開始出現濕疹。

起初我以為係生瘡,就無加以理會,只係用母乳塗上瘡仔部份。

隔咗兩日無好轉,於是帶和牛B睇普通科嘅西醫,醫生都係斷症為濕疹,開咗類固醇藥膏俾我哋。聽到類固醇藥膏,我嗰刻都非常擔心,擔心搽咗之後搞到皮膚薄晒。

但係你真係無辦法唔用,因為母乳咁天然都幫唔到嘅時候,就唯有靠藥物去幫佢。

跟醫生指示薄薄哋搽,係有少少好轉。大概1-2日,皮膚總算靚返少少。

但濕疹皮膚始終不敵天氣,沒有最差,只有更差。每當皮膚好返1-2日,好快又會因為天氣上少少嘅變化,會番發得更加嚴重。

而每次濕疹發作,真係好心痛。塊面紅晒,一撻撻,我自己都好心痛,但呢個時候就總會有人問你,BB塊面做乜事。又或者好好心咁,講解決方案俾你。其實真係好感謝你哋,但愈聽太多唔係專業嘅意見,個人就更加亂。亦由於和牛B係濕疹BB,我真係好唔鍾意人哋摸佢塊面,你見到佢紅晒、標水就唔應該唔好再摸佢,雙手有無數肉眼見唔到嘅細菌,如果傷口感染到細菌,我就真係唔該晒你啦,所以懇請對BB請眼看手勿動!

濕疹發作,痕癢難奈,令和牛B每晚都瞓得唔好,所以我以前好多時會抱住佢瞓,佢就會瞓得好好。但唔好嘅係,佢伏喺我心口,臉仔又貼住我心口,互相發熱,皮膚都會紅晒。

一直維持一段時間,不停轉醫生,直至和牛B大概3個月大,朋友介紹一位相熟嘅皮膚科醫生,和牛B嘅濕疹終於得到醫治。

醫生俾咗唔少建議我哋

1.夏天都盡量穿著長袖衣物 (尤其係BB)
2.盡量戴上BB手套,以防止抓傷皮膚
3.盡量保持皮膚乾爽 (特別係BB玩口水階段)
4.BB衣物要係純棉質
5.沖涼水溫度不要過熱
6.沖涼時間愈快愈好,因為逗留喺水入面時間愈長,皮膚嘅水份就會流失得愈多
7.沖涼後抹乾八成水份,馬上搽上滋潤嘅Cream
8.避免戶外活動 (長時間喺太陽下)
9.留意室內氣溫,唔可以太熱同埋焗

至於飲食方面,醫生話如果BB係食奶粉就要食低敏奶粉。如果媽媽係餵母乳(全母乳)就更加好,咁普遍大家嘅疑問就係,媽媽需唔需要戒口呢?

我: BB有濕疹,我餵母乳需唔需要戒口?
醫生: 除咗魚之外。所有海鮮唔食得,魚要留意返一定要食「咸水魚」。
我: 咁牛肉洗唔洗戒?
醫生: 唔需要
我: 我鍾意食辣,需唔需要戒?
醫生: 唔需要

至於加固方面,醫生亦有提及。要留意有部份食物比較高敏,BB要盡量避免;

BB 1歲半前要盡量避免進食蕃茄、橙,因為呢兩種食物比較容易出現敏感情況。如果真係想餵BB食生果,食蘋果就一定冇事! 每一種食物,亦最好試足一星期先轉,咁就最安全。當然,如果食咗一次/一日就即刻出現敏感情況,咁就唔好再食。慢慢試,唔好心急,唔好一次過加幾種食材,萬一敏感都唔知係邊一樣食物引致BB敏感。

不過濕疹係一個長期戰,醫生都會同你講BB一歲之前因為免疫系統未發育完成,所以係會弱啲,同會持續發作,等到BB一歲之後就會慢慢好返。唔好以為醫生敷衍你,係真o架,和牛B一歲之後的確少咗紅晒一撻撻,亦唔會爛到標水。

所以為咗唔想俾和牛B抓傷皮膚,我哋當時一直保持要和牛B戴手套戴到差唔多一歲。佢識除,除咗我哋就會幫佢戴返。試過無戴上手套,和牛B就會伸手入件衫袖到,睇少一陣,佢都抓到皮膚傷晒,流晒血。

仲有就係,我唔建議使用芫茜水 或 金銀菊 抹皮膚。寶寶皮膚較幼嫩,而且每個人嘅膚質都唔同,未必每個人都適合。曾經和牛B只有3、4個月大時,使用過金銀菊水沖涼,以致皮膚超敏感、皮膚超紅、濕疹更嚴重! 使用前,真係要三思!

**呢張相就係沖過金銀菊浴出事後第二日影嘅相,紅敏依然未退。

而家2歲10個月,皮膚已經好好多,就算濕疹發作,都只係好輕微,勤啲搽cream就會好返。

不過,濕疹底嘅小朋友搽上身嘅嘢一定要小心選擇,同埋要keep住搽cream。


Facebook專頁和牛B嘅成長專頁

Instagramwagyubmami

【編按:以上內容為作者之個人意見及立場】

相關文章

【筋肉寶寶養育記18M】 BB階段最後一次健康院檢查!

生蛇可怕嗎?醫生帶你一探究竟

【新手爸媽必睇】BB需唔需要用枕頭?

資深營養師教路:媽媽如何提升免疫力護養寶寶?

緊貼新冠肺炎最新相關資訊