2017-04-18

24K

【育兒】新手爸媽必睇!健康院一歲打針.檢查內容全面睇

20170418_toddler

「時日太快,無知的小孩一晚長大」時間真係過得好快,原來一轉眼已經過左十二個月啦,小JM已經一歲啦,我亦已經當媽一年了!

 

踏入一歲,亦意味著小JM將會進一人生嘅另一個小小嘅里程,接下來將會有更多新嘅挑戰同嘗試!小JM,你要努力呀!媽媽會同你一齊加油架!

 

一歲嘅第一個考驗與挑戰,當然又係時候到健康院檢查同桔針啦!

 

回想起一年前第一次帶小JM返健康做檢查同打針嘅時候,爸爸都一樣會陪我地去,一齊聽姑娘同醫生講解,有爸爸嘅分擔的確會輕鬆一啲。

 

今次小JM打一歲針又點少得爸爸個份呢。爸爸今朝依然同一年前一樣一早就陪我地去健康院!小JM今次都係第一次要一次過打三枝針咋,所以我同爸爸都有啲擔心同驚小JM會喊。結果真係一如所料,小JM喊到豬頭咁,好彩爸爸係度呵返,出左房門口就無再喊,但有繼續嗚咽,真係陰功豬囉!

 

今次就等小JM媽媽為大家解說一下而家健康院嘅檢查同一歲針需要注意嘅地方啦!

 

小提示:

媽媽們記得、記得、記得要帶健康院嘅手冊同小B嘅針喔,以便醫生及姑姑們做紀錄嘛!(因為很重要,所以要講三次! 不要嫌我煩就可以啦!)

 

因為小JM嘅預約時間比較早,都安排在朝早九點,所以我同爸爸就同平時返工嘅時間一樣起身準備,再幫小JM換衫,準備帶小JM去健康院進行檢查同打針。

 

小提示:

因為需要量度體重同打針嘅關係,建議為小B們穿上比較容易穿著嘅衣物,最好可以選擇腿部能夠解開嘅夾衣,以便打針。

 

健康院檢查流程大曝光

去到健康院嘅時候,健康院嬸嬸會提示媽媽/爸爸到登記處先為小B登記,以便姑娘安排檢查。

 

完成登記手續後就只需要等待姑娘「叫名」,便可以到檢查房為小B進行簡單檢查。

 

檢查包括:

- 為小B磅重及紀錄

小提示:

為小B磅重係需要除去小B身上嘅衣服,只剩下尿片即可(要光光豬喔!)
(如尿片已濕,建議先換好再磅重,以免影響有關數據紀錄)

另外,如果小B係兩個月或以下嘅初生小B嘅話仲需要除埋片片架!

 

- 為小B度高及紀錄

小提示:

姑娘有機會請媽媽/爸爸輕輕固定小B頭部,然後進行量度嘅。

 

完成以上步驟之後就可以帶小B到等候區,等候面見姑娘/醫生(按需要而安排)。

 

與姑娘面見

姑娘將會根據小B剛才嘅檢查紀錄再對小B進行評估,而評估則會分為兩部分進行:

 

第一部分:姑娘會向媽媽/爸爸查詢小B嘅各項狀況及發展

姑娘會向媽媽/爸爸進行提問,以便了解小B嘅日常生活及各樣習性,問題大概如下:

1. 主要由邊個照顧

 

2. 一日會飲幾多餐奶

 

3. 加固情況及進度

-一日食到幾多餐固
-食粥/稀飯/飯
-每餐食到幾多粥/稀飯/飯
-加固嘅食物種類:如菜、肉、魚之類
-茶點類型:如水果、芝士,麵包等

 

4. 說話能力

-除爸爸媽媽以外,仲識唔識得其他發音/ 講其他野
-懂得模仿大人「傾電話」
(呢一部份我地有同姑娘表示我地無俾電話小JM玩,因為係小JM面前我地好少會玩電話/傾電話。但有時小JM見到我地/長輩們玩電話,佢都知道要「畫畫」先會郁)

 

5. 行路情況/進度

-自行扶住行、家人拖住小B慢慢學行

*姑娘會建議家人帶小B出街多啲,等小B自己慢慢學行,同時亦可以拖住小B嘅手教小B學行
6. 識唔識伸手穿衣

 

7. 會唔會用手指著物件

 

8. 識唔識得用水杯/吸管杯

*姑娘會建議小B要開始戒用奶樽,多用杯/ 吸管(小JM突然係姑娘講要用飲管飲野個陣突然要飲Juice,即時表演俾姑娘睇咁話喎!真小氣)

 

9. 玩具類型

*姑娘會建議俾小B現煮飯仔,因為可以訓練小朋友手仔之餘仲可以令小B係不自覺之間學習自己進食添!

 

問完晒以上問題之後,姑娘會俾一個小小嘅測試小B。

 

第二部分:測試小B嘅手指仔靈活度

小測試一:

姑娘取出一個小小嘅膠盒,膠盒入面載有六粒不同顏色嘅正方形積木。姑娘會取出所有積木,再示意小B將全部積木放返入小膠盒為之完成。

 

出賣小JM時間

呢一Part 小JM就發生左啲蝦碌野,仲變相一次過完成左兩個小測試添。話說六粒小積木當中有一粒比較鮮豔吸引,係熒光黃色嘅,小JM一拎上手就已經唔多願意放入小膠盒,只係一路放其他嘅小積木,當所有小積木都放好了,就只剩下小JM手上熒光黃色嘅小積木,小JM依然唔想放手。呢個時候,姑娘諗住用小圈圈餅吸引小JM俾返粒積木姑娘,但小JM都係唔肯,小JM仲拎起左粒小圈圈餅掟返落枱面,而姑娘就唯有搶返粒積木。事後姑娘都讚小JM小手指好靈活,但整過過程好好笑。姑娘亦表示以為搶去小JM手上積木個陣小JM會喊,但一啲都無扭,只係表示「無左」就算,話小JM好乖(似乎姑娘被騙了,在家嘅小JM可是個小惡人呢!)

 

小JM完成咗整過程序後我地先從姑娘口中知道原來小JM已經完成小測試二!

 

小測試二:

拾取小圈圈餅

 

完成以上程序同測試後,姑娘會提議爸爸/媽媽要開始教識小朋友以下事項,以便下次返來健康院再作評估:(打一歲半針及檢查)

-要教識小B認識身體各部份

-可以同小B玩Role-Play

-成功戒用奶樽

 

聽完姑娘講之後我地就出返去等候區啦,係走之前小JM都不忘發揮「親善大使」嘅本色,同姑娘揮手講拜拜!(姑娘仲會俾一本關於加固嘅小冊子俾媽媽添架!)

 

小插曲:

姑娘係睇到小JM嘅體重時候,突然同我講:嗯,小B身高就高左好多,但係體重就無增加得好勁。跟線睇佢就跌左兩條線,不過都係生長線入面,但係見佢又食野Okay,咁應該無問題嘅。定係你地想唔想都見一見醫生?

 

我就一面疑惑,但爸爸就好清醒:好呀,可以嘅話見下醫生都好嘅。

 

於是乎,姑娘就安排咗我地先見醫生之後先再打針。

 

去到見醫生,第一時間醫生就叫小JM瞓低檢查,起初小JM都唔願瞓低,但當醫生準備檢查到檢查完嗰陣小JM都好乖咁瞓定定,直到醫生話可以著返好衫仔。

 

醫生檢查完請左以下說話:「其實小B好健康呀,無問題,體重都無問題!你問我,我可以話俾你知我好鍾意佢副Body添!啲肉又唔係鬆泡泡,係實嘅淨嘅,幾好呀!佢平時食埋食埋係咪都好少瞓,鐘意玩多?(我答:係呀!)係就得啦,佢呢個類型嘅小B係「長計唔長肉」個類,食完就用晒啲體力來玩,玩到攰晒先停,係咪呢?」

 

我:「的確係咁喎!」

 

爸爸:「但係姑娘頭先又話佢體重唔係跟返佢原本條線喎,咁即係點架醫生?」

 

醫生就話:「你個小B係咪人奶B呀?(我答: 係呀!)嗯,係就得啦!可以唔駛睇個本書仔,本書仔條線係俾奶粉B睇嘅,你地小B好標準,媽媽做得好好! 只要小B食得瞓得精神無問題就得!」

 

爸爸:「但係佢有時又好夜先瞓,有時又好早起身架喎!」

 

醫生:「咁都有影響架,最好幫小B改早啲瞓,最好十一點前就要俾佢瞓架啦!幫助生長添架!」

 

聽完晒以上醫生同我地講嘅野之後,爸爸同我都放晒心,原來人奶真係好微妙,小B唔會特別肥大,但就有無窮無盡嘅精力!果然係正野!亦都好興幸每次有疑問嘅時候都遇上好嘅醫生去解答我嘅疑問。真係好感謝呢位醫生咁支持母乳!

 

來到最後一個重要環節啦 - 打針,今次係小JM第一次要打三枝針,分別係:

- 十三價肺炎球菌疫苗(第四針)【政府疫苗名稱:肺炎球菌疫苗(加強劑)】

- 麻疹、腮腺炎、德國麻疹混合疫苗(MMR)

- 水痘疫苗(第一針)

 

其實媽媽都好怕打針,所以真係唔敢由我去抱住小JM打針,上次打一枝媽媽都緊張到眼濕濕,更何況今次係三枝,呢啲粗重野都係留返俾爸爸啦!

 

今次真係左、右脾都要針針啦~~ 第一下桔咗左脾一下,原本就真係無事無喊嘅,但打埋右脾個兩下之後就真係喊到收唔到聲。好彩,出房門前停左,只係嗚咽下咁。

 

抖咗一陣之後就等叫名再去約返打一歲半針嘅期就可以去拎藥走得架啦!

 

可能真係喊得太攰啦,到媽媽去拎藥個十分鐘都唔夠小JM就已經訓著咗啦。

希望小JM打完針會無事啦!亦都希望呢個Blog嘅分享可以幫到媽媽們啦!

 

【編按:以上內容為作者之個人意見及立場】

相關文章

芝大研究:小朋友玩砌圖可發展空間技能 有助對數學和科學理解

【虐兒?】3歲女變「搖錢樹」 被父母狂餵至35KG兼雙腳變形

家長如何幫子女選擇更健康的食物?芝大研究人員咁解釋!

【車內安全】炎夏外出 獨留幼童車內一分鐘都不行!家長下車前應養成4大習慣

緊貼新冠肺炎最新相關資訊