【蠶豆症】聞臭丸藥油可致命，請理解媽媽的「過度緊張」

天氣開始轉涼，大家都紛紛喺衣櫃掏出厚厚嘅冬天衫，唔知大家有無喺衣物度擺放俗稱臭丸嘅習慣；每次換季，鯊魚太都好鍾意嗰陣味，就好似有種爽丫丫嘅清新感，但原來呢陣味隨時埋藏殺機……無錯，係殺機！會死人嗰種殺機，而且絕無誇張！

其實鯊魚太今次想講嘅係香港最常見遺傳病—「蠶豆症」，一種先天性新陳代謝嘅遺傳病，首先呢種病係唔會傳染人，麻煩大家聽到小朋友身邊有患者嘅時候，毋需過份擔心，更加唔使即時彈開，做出一啲唔太禮貌嘅舉動！

自1984年開始，凡喺香港出生嘅BB，都會接受政府免費提供嘅篩選服務，透過抽取臍帶血化驗，知道BB是否患病；患者喺一般情况下，基本健康狀況其實同其他人係無分別，只係當佢哋接觸到某啲刺激物質嘅時候，就會引發紅血球被破壞而分解，造成急性溶血，而急性溶血徵狀包括：臉色蒼白、排出茶色小便 ，初生嬰兒會出現黃疸、過度渴睡，至於小童或者成人就會感覺疲倦、心跳加速同呼吸急促，如果出現呢啲徵狀就需要馬上求醫。

講咗咁耐，好似都唔太關你事？或者都可能係嘅，但其實除咗可以幫忙懷疑病發嘅人之外，如果你滿身臭丸味，又或者喺公眾場合唔舒服搽緊油嗰陣，有家長抱住BB衝落車，嘗試諗多一諗，對方可能懷著心急如焚嘅心情，因為真係無人知患者聞幾耐會出事，了解多啲，畀多一份支持佢哋啦！

高危「蠶豆症」陷阱

由於好多藥物，或者日常使用品都可能引發蠶豆症，所以如果想幫助別人，但又有懷疑嘅時候，記得要留意以下名單：

阿士匹靈類藥物、維他命C、珍珠末、保嬰丹、猴棗散、西瓜霜、跌打酒、退熱貼、鎮痛/止痛貼、驅蚊產品、臭丸、氣霧殺蟲劑、藍藥水、紫藥水等等