2019-11-20

3.1K

媽媽晚晚氹BB瞓覺好嘥時間?3招糾正初生BB作息

點樣氹BB瞓覺係困擾好多爸爸媽媽嘅一大難題。初生BB一日瞓大概16個鐘,不分日夜,每次瞓2至5個鐘,到肚餓或要換尿片就會醒。到咗3個月左右,當BB瞓覺嘅次數減少,但每次時間會漸長,而且變得有規律,爸媽就可以開始建立「睡眠常規」。如果發覺BB日間瞓得多,夜晚眼轆轆好精神,點算好?

討論區熱話:點樣解決BB日夜顛倒嘅情況


1. 幫BB分辨日夜

成人日常生活都係日出而作,日入而息,想BB夜晚乖乖瞓覺,就要幫BB分辨日夜。日間室內光線要充足,就算BB日間小睡,都毋需拉上窗簾;晚間睡前將室內光線調暗,話畀BB知夜晚要瞓覺,之後熄燈。幫佢建立「夜晚瞓覺」嘅認知。另外,除咗日夜光線嘅分別,活動都會影響BB嘅認知。例如日間固定時間進食、沖涼、親子遊戲,可以增進親子感情,亦可減低BB因無聊而喺日間瞓得太多。到咗夜晚就可聽輕音樂,唱兒歌等節奏輕緩嘅活動,避免BB太過興奮瞓唔著。

2. 舒適同安全嘅環境
初生BB瞓覺好多時都會用包被包實,模擬BB未出世之前,喺媽媽肚裡面被逼實無法伸展嘅感覺,營造安全感。不過,用包被時要留意BB會唔會太熱出汗?室內溫度會唔會太熱或太凍,影響BB睡眠質素?空氣係咪流通?另外,要留意選用棉被單,衣服後頸的招牌會唔會令BB皮膚敏感唔舒服,以致BB大喊表示不滿唔肯瞓。

3. 建立睡前常規

瞓覺之前一連串指定嘅活動,可以令BB意識到將要瞓覺。瞓覺之前30分鐘左右熄電視或手機等電子產品,安排一啲輕鬆同舒緩嘅親子活動,例如沖涼、講故事、聽輕音樂等。等佢習慣每晚完成一啲固定嘅活動之後,就係瞓覺時間。當然,爸媽要確保BB食飽奶、掃好風、尿片乾淨,室內溫度適中,BB先會舒舒服服瞓覺。爸媽要盡量訓練BB自行入睡,可以將清醒但已有睡意嘅BB放係床上,開床鈴掛飾,等佢望住公仔轉動同聽住音樂,無咁易覺得沉悶而扭計,訓練佢習慣自己慢慢瞓著。

【編按:以上內容為作者之個人意見及立場】

相關文章

【恐怖】2歲女溪邊海邊玩水致吸血蟲鑽入鼻 曾被誤診過敏性鼻炎

【內有洋蔥】堅強19個月B女完成10次化療 媽:願平安健康快樂長大

學業是觸發管教暴力的元凶

【筋肉寶寶養育記19M】半職媽媽有咩做?日常生活簡單分享

緊貼新冠肺炎最新相關資訊