2020-08-06

550

港爸港媽自己做老師勁頭痕 除咗做家務同煮飯 仲有咩好教?

小朋友停課咁耐,做爸媽嘅就頭痕足咁耐。嚟緊教育局仲話學校新學年唔會安排面授課程,改為網上授課。唔少家長都喺討論區呻「人都癲」、「教到無嘢好教喇」,仲有人講笑問「老師可唔可以出番半份糧畀我?」講真,他條媽媽唔係唔想教,但有時真係技窮!

網上有啲網民都出Post求救,希望各位港爸港媽可以獻計,分享大家學啲乜,他條媽媽先無咁頭痛咋!

到底啲爸媽有咩方法自做老師?等我哋節錄啲正嘢嚟睇吓:


「我一直keep住每日要睇最少1小時課外書;每星期默生字,中英常各10組;每日一定要玩玩具。」

「學吓做家務,學吓煮飯。」

「一齊講故事睇圖書囉,都要練吓專注。」

「有無啲紙盒嗰啲,整吓啲簡單嘅車仔畀佢玩…同佢畫畫、拖地、環保沙槌嗰啲。」

「學執床、食完飯執碗入廚房抹枱、摺衫、吸塵……」

「學咗做補習老師,多功能媽媽系列之一!幼稚園到小一,一對二同時上堂。幼稚園嗰位每日補中英數各2頁,小一嗰位每日輪住做中數同英數,再每人每日讀圖書。」

「我就係一星期一本中英圖書,大嗰個自己睇,睇完我會問佢問題,傾吓對本書嘅睇法。細嗰個就我講一次故事先,然後佢自己睇,跟住佢講番故事畀我聽。做家務玩遊戲一定會㗎啦,一星期一次小實驗或手作,內含數常或藝術文化。學校有畀功課嘅話,我會再安排。係啦,寫吓生字都會嘅。」

「狂畀佢睇科學圖書,睇到佢話想大個做科學家。」

「打機打機不停話要打機,踏入青春期嘔晒血困獸鬥。」

「開YouTube自學樂器!」

 

正所謂「本來父母就是孩子最好的老師」,同仔女相處嘅時間多咗,親子關係分分鐘仲好咗呀。有家長話親子時間多咗,可以同小朋友練結他唱歌;有媽媽話仔女有時會叫咗自己做媽咪老師,好得意呀。都有家長呻,自己要返工,到時都唔知點安排小一嘅小朋友Zoom。「堂堂教育局乜都射個波落嚟,我哋仔女真係慘。」

 

 

網民仲整理一啲教學資源畀家長參考:

Learn Better 學好一點

Learn at home for Asia

Audible Stories

Free Online Textbooks

LearnMode學習吧

CooC Cloud 臺北酷課雲

均一教育平台

熊熊兒童音樂 Bear Music Ltd.

LUNCH DOODLES with Mo Willems!

 

計他條媽媽話,有時都唔使逼得小朋友咁緊嘅,玩樂有時、讀書有時,有時候同佢哋玩吓,大家都開心!媽媽開心,小朋友先會開心㗎嘛!

 

 

【編按:以上內容為作者之個人意見及立場】

相關文章

【新冠肺炎】101個在家親子遊戲合集!(幼兒篇+小學篇)

緊貼新冠肺炎最新相關資訊