早幾日喺公司門口突然間聽到有個男人好大聲咁用粗口鬧人，望清楚原來個男人架車因為違泊喺路邊就畀保安鎖咗，咁佢好嬲覺得自己又冇阻到人都要畀保安鎖車，所以係咁不停用粗口同個保安對鬧，咁個保安梗係唔順氣同佢對鬧喇。鬧到好大聲搞到成條街啲人都望住。但係重點係原來佢哋兩個鬧完之後個男人上返車，跟住湊咗個小朋友落車應該係送個小朋友返學，望清楚套校服應該係我公司附近嗰間幼稚園嘅學生。我同事都見到咁佢即刻就話好心咁大個人仲湊住個細路仔就唔好喺條街度咁樣講粗口啦！教壞人教壞自己小朋友啦！
其實呢啲情況一啲都唔罕有，好多父母都好錫自己嘅小朋友，喺小朋友心目中呢啲父母都係好爸爸好媽媽，但係偏偏對其他人就控制唔到情緒，唔意識到自己嘅一言一行其實都對小朋友好大影響。縱使你係好爸爸好媽媽，但係自己控制唔到情緒，又點樣會交出守規矩又好脾氣嘅小朋友呢！好似呢件事，其實你違泊明明係自己唔啱，我唔理你有冇阻到人，總言之你遵咗規畀人鎖車你就預咗㗎啦！只不過你貪方便又想博下人哋唔會鎖你，但係搏唔到咁你自己咪知道要承擔番個後果囉！點知你又唔順氣仲要咁樣鬧人，仲要咁樣講粗口，個細路仔看在眼裏佢會學到乜嘢呢？成件事個老豆根本就錯曬，首先唔守規矩，唔守規矩衰咗又唔肯承擔後果，跟住仲要發脾氣講粗口鬧人，根本就係自己衰唔起仲要發脾氣唔想承擔後果。連我同事未有仔女都識得話有朝一日個細路仔喺屋企發脾氣講粗口嘅時候，個爸爸千祈唔好後悔千祈唔好話個仔做乜會講粗口，因為幼稚園嘅細路仔佢會講粗口根本就係喺父母度學返嚟。其實好多人都唔明細路仔品行上面學得最快嘅就喺父母身上學返嚟。我唔理你以前點，但係當你一旦成為父母你就要知道其實你嘅一言一行唔只係影響自己，其實仲係影響緊自己嘅仔女。所以一旦做咗父母就要時刻提醒自己要提高自己嘅EQ，要更加學懂守規矩，要更加懂得有禮貌。如果唔係將會禍及你嘅下一代。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
