放完暑假前，雖然佢兩個都一早已經做曬啲功課，但係我都會叫佢哋再檢查多次執好返曬啲嘢，忽然家姐諗起佢份閱讀報告仲有幾本書名未寫，諗住攞返張工作紙出嚟寫返曬啲書名，但係搵極都搵唔到。其實幾日之前都見過份工作紙亦都提過家姐要擺番好，家姐當然冇理啦！最後搵咗幾個鐘都搵唔到，而且發現可能係早一日連埋啲廢紙一齊丟咗。我哋當然有話佢幾句啦，因為成日都提佢擺好啲嘢，細佬都同樣要做呢份工作紙同埋暑期作業，但係就聽話一做好就將份工作紙夾咗喺本暑期作業度然之後擺咗喺書櫃。
其實家姐今次已經唔係第一次唔見咗啲功課，上一次又係一張工作紙又係咁樣嘅情況搵唔到，終於要我老婆喺啲家長群組度問有冇同學可以借張工作紙畀佢影印嚟做過。今次又係咁，但最慘嘅係今次份工作紙有成十幾張紙咁多。其實放暑假第2日家姐已經做好曬，今次要補做就要用多好多時間。但係今次我哋冇幫佢解決呢個問題，因為已經發生過一次，所以我今次我哋要佢自己解決呢個問題。我同佢講一係就第二日我車佢返學校，佢自己入去校務處問老師有冇可能有第二份工作紙畀佢重新做過。如果唔係佢就要自己問同學，請人哋嘅家長幫佢手。
呢個時間見到家姐已經好緊張驚到有啲想喊，我哋都知道鬧佢亦都冇用。我哋只係想佢汲取教訓，所以只係提供咗啲可行嘅方法佢自己去選擇。最後佢自己喺個家長群組度錄音，問有邊個同學未做好或者有邊個同學可以借份工作紙畀佢印，終於佢都搵到同學借份工作紙畀佢影印。跟住我就帶咗佢去同學嗰度，佢自己問同學攞咗份功課仲要唔該人哋家長幫佢印咗，跟住返屋企先用塗改液塗咗人地啲答案，再好快咁做咗嗰十幾張工作紙。最後我仲要佢親自打電話唔該個同學同埋個佢個家長。
其實幫佢搵工作紙嘅時候我個心情都係唔好亦都係有啲嬲，因為已經提過佢好多次佢都唔上心，但係都已經唔見咗，喺嗰段時間其實鬧都冇用。又再一次話俾自己聽其實做家長EQ真係好緊要，只係不停鬧唔幫佢一齊諗方法，其實解決唔到問題。反而提供啲方法畀佢，佢自己解決咗之後先至再同佢傾，可能個效果仲好。佢亦都會更加記得呢個教訓。講真就算鬧完，都係要搵方法幫佢，咁不如收起啲火先，同佢一齊解決個問題可能大家嘅關係仲會好啲。呢一次做完咗嗰十幾張工作紙之後佢就好緊張咁放好。臨開學我叫佢執咗個書櫃將啲唔要嘅書同埋簿丟咗佢，我就見到佢今次真係好小心逐本逐本檢查睇清楚啲嘢先丟。其實有陣時錯已經發生咗，我哋最希望細路仔可以喺錯誤中汲取教訓去改善之後自己嘅做法。我唔係唔話佢哋，但係真係要適可而止。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
