前兩日朝早返工，一入𨋢就見到一個小朋友同佢個家傭姐姐係𨋢入面，本來都冇乜留意，但係個小朋友發現啲好唔耐煩嘅聲音，個小朋友大約五六年級，喺𨋢入面好忟憎咁梳緊頭，跟住佢突然間好忟憎咁喺個家傭手上搶咗個頭箍，我聽到個工人姐姐只係提醒佢下次要早啲起身咁就唔使咁趕。點知個小朋友一聽到仲即刻發脾氣話返個家傭，跟住個家傭姐姐就冇再出聲。但係個細路仔就依然喺架𨋢入面好忟憎發出埋曬啲好冇禮貌嘅聲音，出咗𨋢之後個姐姐想拖返個細路點知個小朋友仲好冇禮貌咁甩開個家傭姐姐隻手。個小朋友嗰副嘴臉乞人憎到連我返工就算啲下屬做錯嘢我都唔會有呢副嘴臉。
見到咁我心入面喺度諗有冇搞錯呀！究竟乜嘢嘅家長可以教到個小朋友咁冇禮貌。 呢個就係典型嘅家教問題，照計如果個小朋友自細跟住個呢個家傭姐姐，而父母亦都有個好榜樣有禮貌咁對個姐姐嘅話個小朋友唔會咁做。我成日都講家傭都係人，係人都會有情緒，其實你對人好人對你好。家傭姐姐做嘢肯做多步同上心啲，其實都可以幫到父母好大忙。我同我老婆都要返工好多時就係家傭姐姐對住我對仔女，只有當佢係家庭嘅一份子佢先至會當我對仔女係自己人一樣去愛錫。人哋都係打份工，你對人好人哋就自然對你好。有啲人可能會覺得家傭只不過係幫自己打工，有冇必要對佢咁好呢？話曬自己都係僱主。我唔知啱定錯，但可能我比較好彩，第一個請嘅家傭就一路湊住我對仔女大，已經做咗好多年，但我淨係知道你要人哋對你好你必然要先自己對人哋好。更加我哋係小朋友嘅榜樣，細路仔出世白紙一張，其實佢就係學緊我哋點樣對人同點樣去處理人際關係。好似我見到嘅呢個小朋友咁，其他人眼中佢只不過係個乞人憎同冇禮貌嘅細路。更加重要係佢嘅父母害咗佢，都係嗰句究竟係點樣嘅父母能夠交出一個冇家教冇禮貌嘅細路呢！
唔知點解有啲人番工做細嘅就希望老闆對自己點好點好，但係一返到屋企自己做老闆就乜都唔記得晒。人係咪真係要咁矛盾呢！
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
