家姐琴日做功課期間突然間走出嚟問媽媽個藍芽喇叭叉完電未，因為我老婆放咗喺間書房度叉電，我同老婆都覺得有啲奇怪，無端端做乜問佢個喇叭叉完電未呢。我老婆仲以為家姐係咪要用個叉電器。咁我老婆就入去睇吓，點知一睇就發現個藍芽喇叭叉電嗰個位爛咗。望一望家姐個樣，其實都估到個喇叭爛咗應該同佢有關，但係佢冇講係咪佢整爛，淨係話睇下個喇叭叉完電未就發現係咁。我老婆當然有問係咪佢整爛啦！家姐開頭都冇出聲，佢又冇話唔係，但係就淨係話佢睇下叉完電未嘅時候就已經爛咗。其實以我哋平時對家姐嘅了解，如果唔係佢整爛嘅佢一早就已經話唔關佢事，家姐今次咁講即係唔多唔少都同佢有關。最後我同佢講我哋唔鍾意人講大話，問佢係咪佢整爛嘅。跟住佢先至講係自己做做下功課嘅時候撞到個喇叭，然後跌咗落地下，跟住執返上嚟嘅時候就發現爛咗。
其實整爛嘢我哋一啲都唔介意，反而在意嘅係家姐開始講大話。所以今次我同老婆都有話佢，重點唔係在於整爛嘢而係在於佢唔坦白。當然亦都要佢即刻同老婆道歉啦！道完歉佢都人中喺度喊緊，所以我叫佢去抹乾眼淚再去完成埋啲功課。我哋亦都冇特別再話佢。
到咗夜晚出完街食飯返嚟，我老婆終於都開聲同佢講，因為覺得他其實都冷靜咗同埋係需要佢了解返件事。我哋同佢講其實小朋友做錯事唔係最重要，有邊個小朋友冇做錯事呢？犯錯絕對唔緊要，但我哋希望小朋友做錯咗事應該係勇於承擔責任同埋坦白。好似今日整爛個喇叭呢件事咁，其實我哋最唔開心嘅係佢唔坦白反而仲諗住講大話嚟掩飾。 我哋明白亦都知道佢驚畀人鬧同驚畀人罰會唔開心， 所以先希望諗住講大話嚟掩飾。 但係我哋同阿女講其實講大話自己仲辛苦，畀人發現咗可能仲大件事，而且為咗掩飾，所以俾人問多幾問仲可能要講更多大話，越講得多就越容易俾人發現。好似今次呢件事咁，其實佢坦坦白白講件事出嚟，可能就已經冇事。但係講大話反而仲令到件事複雜咗，令到爸爸媽媽更加唔開心。 我哋希望佢明白要做一個肯承擔負責任嘅人，我哋同佢講我哋最唔開心嘅唔係喇叭爛咗係佢想用大話去掩飾。我哋問佢其實講大話嘅時候驚唔驚，佢話其實講大話嘅時候都驚同埋要諗點樣解釋畀我哋聽我哋先至會唔發現佢講大話。正正就係呢一種心情，因為一開始講大話就更擔心俾人發現，我哋就係講畀佢聽其實你與其係咁不如坦白講可能仲會輕鬆一啲，同埋承擔責任反而可以快啲解決咗件事。
細路仔講大話可以話係經常都會發生，原因不外乎唔想畀人鬧同埋驚畀人罰，針對呢一點做家長正正就係要醒目一啲，要細心一啲，唔好諗住事少就算數，一定要畀佢知道講大話嘅後果係嚴重過坦白承認做錯嘅事。如果家長唔細心成日都畀細路仔講大話過咗關，咁就會好容易養成講大話嘅習慣。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
