一場疫症令到好多本來以為理所當然有嘅嘢而家都變成好珍貴。我哋呢一代 自細屋企已經教我哋要自律，要有禮貌同要有公德心，但係只要留心呢幾個禮拜嘅新聞或者facebook，就會發覺上面講嗰幾樣嘢原來唔係理所當然而係一啲好珍貴嘅特質。
而家當人人都抗疫嘅時候，帶番個口罩有幾難呢？但係偏偏你就會見到有啲人連坐巴士都要唔戴或者除低個口罩，畀人話仲要好似理直氣壯咁。要隔離嘅就為咗自己嘅方便 違反隔離令完全唔理其他人，最好笑嘅係早幾日竟然係個爸爸帶個要隔離個女出去食飯，搞到連人哋間舖頭都要停業消毒。呢啲老豆真係唔知點樣教女。
年老嘅一輩有陣時佢哋頑固嘅諗法你真係唔會明點解。但係後生嗰輩就好明顯係教育出咗問題，甚至乎係家庭教育有問題。早兩日我聽收音機講話有個調查發現原來有成七成父母係覺得教導禮貌自律呢啲主要係學校嘅責任。我同老婆聽完都覺得有冇搞錯，唔怪得知而家個社會搞成咁。細路仔自細就跟住父母教佢哋禮貌自律同公民責任等等，其實就係應該喺父母身上學返嚟， 只要自細父母留心做好榜樣，到佢哋入學配合埋學校嘅教育佢哋就會覺得所有嘢都順利成章，唔會覺得點解學校咁教但係屋企嘅父母就唔係咁做。最簡單好似過馬路一樣，幼稚園學校已經教要守規矩用紅綠燈，但係返到屋企原來屋企又唔係咁做，咁佢哋要學邊一套呢？而家好多人都以自我為中心，樣樣嘢都先考慮咗自己，只要自己方便自己開心就得，問題就係好多時父母都只以自己仔女為中心， 唔去考慮其他人同埋係咪對仔女做成一個壞榜樣。
有啲人嘅諗法係只要自己過得好自己覺得開心使乜理人咩，但重要嘅係其實只要個社會大家都做得好 教好自己嘅細路仔，將來佢哋生活嘅社會，只會越嚟越好享受成果都係自己嘅仔女。但今時今日如果個個都自私，到頭來社會越嚟越差受害嘅咪又係自己嘅仔女。拜託所有身為家長嘅真係應該負返起自己嘅責任，唔係我哋嗰啲認為理所當然嘅特質好快趣就會消失，到頭來受害嘅都係自己嘅仔女，因為呢一個係佢哋將來生活嘅社會。唔好再話俾自己聽 呢啲係學校嘅責任，其實只要自己做好榜樣，自己先做一個有禮貌有公德心自律嘅人，咁仔女自然就喺我哋身上學到，唔好再只係推卸呢個責任畀學校。唔通做好榜樣真係咁難？
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
