前幾晚開始又試再回復食飯嘅時候要熄電視嘅規矩。其實由兩個小朋友好細個開始，食飯嘅時候屋企都唔開電視，更加唔好話用電視嚟送飯，因為實在見過太多親戚朋友嘅細路仔食飯嘅時候淨係顧住望電視，又或者食飯嘅時候冇規冇矩跑嚟跑去，食食吓飯又走去玩，啲父母，工人或者老人家又要追住餵，食餐飯要成個幾兩個鐘頭，大人把口就一路鬧話唔準咁，又話再唔食就冇得食，但身體就好似失控咁一路追住餵。有啲細路就更加冇咗部手機冇咗部電視就更加難氹佢哋食飯。所以自細就訓練自己對仔女食飯會有食飯嘅規矩。最簡單食飯唔準開電視，食飯時候就係一家人溝通同傾偈嘅時間。佢哋未入學嘅時候因為日頭屋企得佢哋所以到我哋兩公婆放工返嚟食飯就會成家人好多嘢講，到佢哋返學時，食飯嘅時候又係講好多學校同埋屋企嘅嘢，所以全家人食飯就係溝通嘅時間。
到佢哋再大啲已經有曬呢個規矩，所以食飯嘅時候有陣時就會開電視睇新聞，但係亦都唔影響大家食飯，因為佢兩個嘅規矩已經建立曬。但係因為而家疫情。多咗時間係屋企 好多時佢哋一早已經做完曬啲功課同練習，咁我哋就會畀你睇吓卡通，我同老婆亦都多咗時間係屋企，起碼少咗好多OT先， 所以屋企嘅食飯時間都早咗，導致佢哋有一套好鍾意睇嘅卡通片，以前可以睇完先食飯，但係而家因為早咗食飯所以套卡通片做咗一半佢哋就要食飯， 又唔忍心佢哋睇睇下熄咗部電視，佢哋好似好唔開心咁，所以就畀佢哋睇住食。但係點知我老婆就成日話佢哋啦淨係顧住望住個電視，終於話咗兩日，如果再望住部電視食飯就唔準開電視。但係因為套卡通片可能真係太吸引， 我老婆終於都忍唔住所以我哋又回復熄咗電視先食飯嘅規矩。
其實呢啲都係訓練小朋友守規矩最基本嘅方法。要小朋友守規矩，最重要就係要由家長開始，能唔能夠營造一個環境令佢哋知道規矩係點，除咗要同佢哋講個規矩係點之外，仲要有唔守規矩相應嘅後果。我唔係話一開始就要罰要鬧，好似食飯睇電視咁，如果講咗話唔專心食飯就熄電視，就一定要做到。講咗食食吓飯離開開張枱去玩就會收嘢冇得食就要做。我自己對仔女都試過好細個嘅時候食緊飯行開咗去玩，當警告咗一次兩次之後，真係試過收曬佢哋啲飯冇得食。當佢哋知道父母真係講得出做得到嘅時候，佢哋就會知道守規矩。好似我對仔女咁自細習慣咗食飯唔開電視，唔可以離開張枱，更加唔好講話玩玩具。咁好快佢哋食飯就已經唔係一個問題。有啲家長可能會覺得要小朋友守規矩好似好難，好多時問題都係出自於家長自己可唔可以一齊守到個規矩，有陣時會唔會自己心軟。我自己嘅睇法就係開頭可能有少少唔開心，但係長遠佢哋就學到個規矩亦都會習慣，反而減少咗之後嘅麻煩同埋唔開心，可能就係長痛不如短痛。另一方面家長自己本身有冇一套規矩亦都係好緊要，因為細路仔其實都係跟家長。好簡單你要細路仔專心食飯，會唔會家長自己都係揸住部手機嚟食飯呢！要細路仔有規有矩，家長自己都應該先做到有規有矩。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
, 例如, 卡通係星期一至五5:30做既,看完才吃, 星期六日咪吾洗咁咯, 5:30 / 8:00吃
返回列表
