少年成長今日: 2|主題: 16017

收藏本版

發帖

返回列表

跳至頁

查看: 3503 | 回覆: 0

為咗部手機要去寄宿 [複製鏈接]

csir3290

子爵府

積分: 12042

1^#

發表於 20-9-13 11:02 |只看該作者 |倒序瀏覽 |打印

早兩日撞到個舊同事傾開，原來疫情期間佢個仔同老婆都留咗喺深圳冇番香港。呢個同事一向都係深港兩邊走，而佢個仔就住深圳但喺香港返學，所以佢個仔一路都返唔到學。咁講開原來佢最近決定幫佢個仔9月喺深圳搵一間寄宿學校開學放棄香港個學位。講落佢之所以放棄香港個學位原來唔係為咗畀佢個仔盡快開學，而係為咗佢個仔一路成日都手機不離手，父母卒之都搞佢唔掂，於是佢哋覺得搵到間寄宿學校可以唔比帶手機入去就可以解決問題。所以最後就決定畀個仔入去寄宿學校，希望可以改善佢玩手機嘅問題。

聽我舊同事講佢兩公婆都好苦惱，但係得呢個仔所以好多時乜嘢都盡量就佢，我舊同事就因為成日忙住工作港深兩邊走，佢老婆雖然係家庭主婦，但係又有好多家務要做，而且得佢一粒仔亦都冇乜人陪佢玩，所以個仔好細個就已經開始畀佢接觸手機。開頭又係嗰啲以為幫阿學英文等佢睇卡通片又可以等佢坐定同安靜啲(即係電子奶咀)，到大個啲就畀佢玩下遊戲解悶，但係細個唔識得教佢節制，亦都唔幫佢養成其他嘅興趣，終於手機就成為唯一嘅興趣。又係嗰啲過程啦，開頭唔係好注意，到佢越嚟越大先至開始發覺成家人越嚟越少溝通，先至開始注意到阿仔機不離手，細個爸媽都仲可以攞走部手機，大個啲已經唔可以。今年佢個仔應該升中二，其實咁大個都已經好難改變佢嘅生活習慣，所以佢最後希望就係諗住送佢去寄宿學校，好似戒毒咁可以解到鋪手機癮。佢話佢個仔開頭好唔願意，爭啲家變咁濟。不過幸好佢個仔平時都仲算聽屋企人講，最後無可奈何都送到佢入去呢啲寄宿學校度讀。不過我都有提佢要好好珍惜星期六日阿仔放假返屋企嘅時間，慢慢建立返親子關係，如果唔係到頭來阿仔習慣咗寄宿生活自己一個，最後可能連僅餘嘅親子關係都冇埋。

至於人哋嘅家事我當然唔方便插嘴咁多，但係其實呢個又係一個好好嘅例子證明，如果自細就用手機嚟消磨細路仔嘅時間，諗住用電子奶嘴嚟減輕父母喺管教上嘅負擔，到頭來終於都需要用更多嘅時間去處理手機成瘾嘅問題。我唔係話唔畀細路仔接觸手機，而係家長應該一步一步嚟，住要觀察住小朋友嘅發展，唔可以放咗部手機俾細路就算。另外，除咗手機之外仲要培養細路仔其他嘅興趣，手機絕對唔可以成為細路仔唯一嘅興趣。細路仔自細點樣養成用手機嘅習慣其實最大影響嘅就係父母。如果到問題去到讀中學先至想處理到時就唔係咁容易處理到。不要讓手機成為親子關係中最大的敵人。