早幾日喺公司做緊嘢，忽然間收到阿仔老師嘅電話，都心知不妙，因為老師非必要都唔會搵爸爸。老師基本上係投訴阿仔交功課寫啲字寫得唔整齊又唔靚。老師話已經專登問過呀仔班主任，但班主任又話阿仔啲字唔係咁差所以特登打嚟，因為阿仔已經連續幾次教佢嗰科啲功課啲字都寫得唔係咁好。其實我同老婆一路都有話阿仔啲字，不過佢有時其實好睇心情，亦都睇嗰日多唔多功課做。如果嗰日多功課做而佢嗰科啲功課佢又擺喺後面先至做嘅話，啲字就會寫得差啲。有陣時我同老婆見到佢啲字太差都會叫佢擦咗去再寫，但又唔想經常叫佢擦或者做過曬，因為咁樣反而會令到佢越寫越忟憎越做越冇心機。老師都認同我嘅做法，當然我哋都會提醒阿仔再改啦！以阿仔嘅性格老師打到電話嚟，佢一定會非常緊張正如我同老婆成日都講，阿仔係要試過畀老師鬧過，佢自己先至會承擔責任，佢就會肯用多啲心機落去寫。
不過呢個都唔係重點，原來老師打畀我之前，打過去屋企又咁啱係阿仔聽電話，老師自然問阿仔點解啲字寫得咁差。但係老師可能唔知道阿仔係非常之緊張亦都怕老師，所以佢完全唔識反應亦都唔知點答，所以老師問咗好耐佢都冇答過老師。最後老師就打咗畀我因為佢搵唔到我老婆又擔心阿仔情緒有問題。當我老婆覆返老師但係又未聯絡到嘅時候，佢打電話返屋企問發生咩事，阿女同我老婆講話阿仔聽完個電話之後就入咗房閂埋房門仲鎖住咗。咁我老婆聯絡返老師問番件事，老師亦問阿仔而家點，老婆同佢講話佢而家鎖住咗道門唔肯出嚟又唔肯見人。可能就係呢樣嘢令到老師更加擔心，我放工跟住車埋老婆返屋企，老婆講話細佬已經喺房出返嚟，情緒亦已經平復。咁我老婆就覆返電話畀老師等佢哋知道阿仔嘅情況亦都可以放心。
其實阿仔啲字有陣時寫得好，有陣時寫得差我哋一早都知道，可能嘅情況之下我哋都會要佢改，帶有時就係唔想太傷佢自尊心所以冇話好狠心咁將佢所有字都擦曬佢寫過，可能我哋要求唔係好高總之睇到阿仔啲字寫乜就算數，不過我哋都一早同阿仔講話佢啲字如果再係咁遲早會畀老師鬧。而我就係諗住等佢畀老師話過一次之後，佢就會應該記住呢個教訓，因為呀仔咁在意老師同佢講嘅說話亦都咁驚老師。我總係覺得有陣時勉強迫佢佢唔願意，不如等佢經歷下先，好似今次咁佢經歷過呢個經驗之後係啱啱過去呢一個禮拜，我哋再睇佢啲功課佢啲字真係寫得清楚好多，雖然唔係話好靚但係起碼清楚。細路仔有陣時就係咁，如果唔係啲乜嘢大問題有陣時畀佢親自經歷一下，可能佢仲會更加深刻，更加會時刻提醒自己。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
