眨下眼9月開始阿女就正式成為中學生。除咗學業成績之外，同好多家長一樣最擔心嘅就係佢開始進入反叛期。我唔係話呀女而家開始已經唔聽話，其實阿女自細一路都好聽話，但係好多家長都係咁講，細路仔一進入中學開始就冇再好似以前細個咁聽話，就係所謂嘅反叛期。
成日都會聽到有家長講細路仔好似頂心杉咁，樣樣都同自己作對，叫佢行東佢就行西，好似時時都係自作主張唔聽家長講咁，樣樣都好似為反而反咁，呢個就係細路仔進入反叛期家長最覺得嘅表徵。但係我自己就覺得細路仔到咗呢個階段，有呢個情況出現好多時都係因為佢哋開始有自己嘅諗法，無論佢哋嘅諗法係啱定錯都好，但係佢哋都期望家長應該要尊重佢嘅諗法，佢哋會覺得家長事事都係迫佢哋，唔尊重佢哋，所以好多時爭拗就會發生。需要過渡呢一個所謂反叛期，我覺得其實唔好去到反叛期開始先至諗方法，應該要由細路仔細個嘅時候開始就要預備。
點解咁講，因為好多時家長會覺得細路仔細個，乜嘢都應該聽自己講，所以乜嘢都幫細路仔決定，細路仔喺嗰個階段根本亦都未必有啲乜嘢諗法，所以好多時都會聽家長講，呢一種情況往往就會導致因為細個嘅時候樣樣都會係家長話事，但到佢哋開始大個有自己諗法嘅時候，佢哋未必會再咁同意家長嘅做法，但係因為家長自細就已經習慣咗事事都話曬事，所以細路仔稍一有自己嘅諗法，就會唔習慣覺得佢哋唔再聽話唔再好似以前咁樣樣按照家長嘅決定去做。所以我覺得要由細個開始就要教細路仔點樣去做決定，亦都要尊重細路仔嘅諗法，我成日都話除非嗰件事大件事到會令個細路仔受傷或者錯咗返唔到轉頭，如果唔係細個開始就嘗試習慣聽下佢哋嘅講法，尊重下佢哋嘅諗法畀佢哋決定，尤其是要習慣聽佢哋嘅講法！因為喺反叛期入面好多時都聽到啲細路仔就係講話家長唔肯聽佢哋講，唔肯尊重佢哋嘅諗法。
另外一種我覺得好常會導致細路仔去到升中嘅時候出現反叛嘅情況，就係喺細路仔細個嘅時候，家長樣樣都就曬佢，樣樣都聽晒佢講，即係「寵壞」咗，到中學嘅時候因為佢哋嘅諗法同埋佢哋需要嘅嘢，唔再好似細路仔嘅時候咁單純，家長就會開始會覺得佢哋嘅要求過份，但係去到呢個階段因為已經就慣曬，當家長稍為有啲唔同意佢哋嘅諗法嘅時候，就會產生矛盾同埋爭執。
所以要減少反叛期出現嘅情況，就要由細路仔細個開始教懂佢哋乜嘢叫做尊重人哋嘅諗法，另外又要適當咁教我哋點樣去做決定，家長要學懂放低自己嘅威權，需要聽細路仔嘅諗法亦都需要適度地尊重佢哋有自己嘅諗法，同埋要畀佢哋做決定。我相信如果自細開始訓練，到細路仔長大嘅時候出錯機會亦都會減低。
我唔係話咁做就可以完全杜絕反叛期嘅出現，因為造成反叛期細路仔出現反叛行為其實仲可以有其他嘅原因，但係如果家長能夠由細路仔開始長大嘅時候，慢慢去適應慢慢去過渡，多啲聽佢哋嘅諗法多啲了解佢哋嘅感受多啲尊重佢哋嘅決定，到細路仔進入所謂嘅反叛期嘅時候，其實家長亦都已經慢慢能夠過渡同適應，親子之間多啲嘅諒解，多啲嘅溝通自然出問題嘅機會就會減少。凡事都係要盡早預備，當細路仔進入反叛期發覺出現問題嘅時候，家長都應該要反省其實同細路仔嘅相處方式有冇問題。更加重要嘅係要喺細路仔未進入反叛期嘅時候，儘早同佢多啲嘅溝通尊重佢哋嘅諗法，示都要教佢哋懂得尊重人哋嘅諗法。要做到呢啲，家長唔係得把口講，更加重要嘅就係自細開始要身教。用自己作為一個榜樣去教導細路仔乜嘢叫尊重乜嘢叫體諒，同教佢哋要講出自己嘅感受。希望咁樣可以能夠減低佢哋喺所謂反叛期出現問題嘅機會。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
