少年成長今日: 0|主題: 16056

收藏本版

發帖

返回列表

跳至頁

查看: 27235 | 回覆: 10

英中的煩惱 [複製鏈接]

csir3290

子爵府

積分: 12264

1^#

發表於 21-12-26 11:37 |只看該作者 |倒序瀏覽 |打印

琴日同個親戚傾開佢好擔心個仔嘅情況，因為佢個仔最近喺學校好似有啲情緒唔係好穩定。呢個小朋友細個好聽話好勤力讀書，爸爸媽媽亦都緊張佢嘅學業，咁當然如無意外考咗入間英中。但係入咗呢間中學之後，佢發覺阿仔嘅成績追唔到，而且諗嘢越嚟越負面成日覺得自己唔及人，亦都好固執。最近喺學校仲有啲操行問題發生咗，爸爸媽媽問返佢，佢就話喺學校冇乜朋友冇乜人留心佢所以用想用啲方法吸引人注意刷存在感。父母當然好擔心啦！亦都試過同佢傾過好多次，希望搵到方法幫佢。

我同呢個親戚傾偈聽佢哋呻吓，亦都嘗試分析下問題。其實有一啲小朋友上到去英中都可能有好多適應嘅問題會發生。我同阿女講其實係佢五年班嘅時候已經開始同佢分析俾定心理準備佢，因為去得英中嘅學生喺小學嘅時候好可能都已經係精英班，受到老師同學嘅注視。而喺學業方面亦都係學校重點培養嘅學生。但係一旦去到英中，當全間學校嘅學生都係咁叻嘅時候，可能個細路仔就未必咁快能夠適應到唔再受人注視，或者適應唔到自己唔再係學校最叻嗰批學生。其實呢一樣嘢對個學生嚟講都係一個好大嘅衝擊，由以前喺學校萬千寵愛變成現在喺學校入面可能同普通一個學生冇分別，再加上如果間學校嘅程度真係好高，大部分嘅學生都係咁叻嘅時候，自己就可能被比下去，對於個細路仔嘅衝擊可能好大。

再加上入得英中學生嘅家長一般都係好緊張自己仔女成績，發覺自己嘅仔女成績可能冇以前咁好嘅時候，可能連家長自己都適應唔到。自自然然可能大部份嘅話題都係圍繞學業上面去同仔女傾，而最怕就係喺仔女面前流露出失望嘅表情同埋埋怨嘅說話。試想像個細路仔以前喺天堂上面咁高突然間跌返落地面，咁佢點樣能夠適應呢！

其實我都唔知有啲乜嘢方法可以實際幫到，我只係講睇下會唔會幫個細路仔搵下其他嘅興趣，幫佢慢慢建立返啲成功感，亦都唔好經常將個話題集中喺讀書上面，因為除咗讀書之外其實仲有好多嘅生活。當父母個聚焦點只喺學業上面嘅時候，個細路仔就更加只會接受唔到自己成績差咗。其實家長亦都要明白細路仔成績差咗，未必關佢嘅能力問題有關，亦都未必關佢係咪懶咗嘅事，可能只不過同佢身邊嘅學習環境唔同咗有關。我個親戚同我講話已經唔係要求佢科科考得好叻，只不過係要求佢有進步最起碼都合格，但係可能問題正正就在於把口就講只係要求進步，但係其實就講緊要合格，如果我哋識得欣賞佢嘅進步，而進步可以係好多方面，唔一定係只係由唔合格變成合格。例如由10分變成15分，又或者以前係考試先溫習到而家用多咗時間去溫習，又或者用咗唔同嘅溫習方法等等呢啲都可以係進步。但係雖然佢係進步咗，到頭來可能都係唔合格嘅時候，父母又懂唔懂得欣賞呢一種嘅進步呢。另外父母懂唔懂得幫佢建立除咗學業以外嘅其他生活呢？會唔會懂得欣賞佢其他方面嘅成就呢？

如果父母只係專注於仔女嘅學業，而只係用學業成績嚟衡量仔女叻唔叻，當仔女唔能夠喺父母身上搵到足夠嘅認同同埋成功感嘅時候，自自然然就會用其他嘅方法係其他人身上去刷存在感同埋認同感。父母要明白每一間學校都有考第一同考第尾嘅學生，以前小學係band one嘅學生但係當去到一間全部都係band one學生嘅學校嘅時候，band one嘅學生都有高低，係咪仲係用以前小學嘅心態去面對自己仔女嘅成績呢？家長應該要知道未必係自己嘅仔女成績差咗，只不過係佢嘅對手唔同咗環境亦都唔同咗而造成。同時家長亦都要為自己同埋仔女一早做定心理準備然之後慢慢過度同埋適應。