少年成長今日: 0|主題: 16130

收藏本版

發帖

返回列表

跳至頁

查看: 25322 | 回覆: 1

夫妻不和 [複製鏈接]

csir3290

子爵府

積分: 12776

1^#

發表於 23-7-16 11:12 |只看該作者 |倒序瀏覽 |打印

夫妻之間總會有拗撬，總會有意見唔一樣嘅時候。上個禮拜我同老婆就遇到，話說上個禮拜有一日全家出街食飯，本來都好好地傾偈，但係大家突然間講到個話題嘅時候，我老婆同我嘅睇法有啲唔同，最後重演變到我老婆好似有啲怪責我咁。其實本來冇乜嘢，但係可能言者無心聽者有意，變成我覺得老婆講嘢好似針對我咁，令到我好唔滿意，好似喺啲仔女面前好唔俾面我咁。其實可能我老婆覺得冇乜嘢，但係其實我嘅內心一路都好唔開心，所以由嗰一刻鐘開始我就變得冇再講嘢，臉上亦都睇到我唔滿意。立時成餐飯嘅氣氛即刻變得好唔同，由原本大家都有嘢講變成成餐飯都好似冇嘢講咁。連對仔女亦都即刻感受到嗰種氣氛嘅變化，亦都變得沉靜。勉強食完餐飯，喺返屋企嘅車程入面，成程車大家都冇講過一句說話，大家困埋喺同一個車箱入面氣氛變得好沉靜怪怪咁。我心入面覺得我老婆唔啱，佢唔應該咁樣講說話，所以佢應該道歉或者應該主動同返我講嘢，但係我相信我老婆就唔係咁諗，所以返到屋企後大家都係各自做自己嘢回應亦都好冷淡，仔女可能都感覺到我同老婆之間好似有啲意見不合，總之成間屋嘅氣氛就怪怪哋。嗰晚就係維持住呢個怪怪哋嘅氣氛同狀態，大家都冇乜講嘢，阿仔同阿女就做自己嘢，我同老婆又係各自做自己嘢最後各自返房瞓覺。我好唔鍾意呢的氣氛，之前亦都同老婆講過唔想將啲爭拗帶過夜，但係當刻鐘度氣好似落唔到，咁成晚輾轉反側覺得老婆應該開聲先，最後成晚都瞓得唔好。終於第二朝喺大家起身前，搵咗個機會諗攬返老婆大家都冇乜講其他，咁就解決咗件事。因為我同老婆都曾經有個共識就係唔理乜嘢事都好，只要肯攬返對方，大家就冇嘢。其實只係差一步，就係邊個肯做先，但係雖然好似好簡單只係攬一攬對方，但係對好多人嚟講行出呢一步就係好困難，因為下唔到度氣。但係我想深一層，琴晚全家人嘅氣氛都已經係咁，到第二朝大家起身之後如果再維持住呢個狀態，我諗大家都唔會開心。對仔女亦都更加會感覺到爸爸媽媽之間有問題。所以唔理邊個啱定錯，其實攬一攬就已經解決咗。

其實呢件事更加話畀我哋知細路仔係唔會唔知道父母之間有問題，淨係琴晚食餐飯大家冇乜嘢講都已經感覺到父母相處上可能出現問題。所以點能夠相信有啲家長話為咗仔女要有健康家庭成長，所以寧願忍住自己唔開心都要勉強維持住家庭，父母就算相處上有少少問題，細路仔都係敏感，大家同住一間屋點會唔知大家相處上有問題呢？有啲父母以為勉強維持著一個有名無實嘅夫妻關係，喺仔女面前扮冇嘢閂埋房門就各有各，咁就已經係對仔女最好，但係好似我呢個例子咁，其實我只係同老婆有少少意見不合，對仔女都已經即刻感覺到，好難想像如果一個家庭一對父母長期缺乏溝通大家互不關心互不理睬，仔女係可以當冇問題咁，仍然相信自己係喺一個所謂健康家庭入面成長。可能兩三歲嘅細路仔你都仲可以呃得到，但係細路仔越大其實就會越敏感，點會睇唔出其實只係表面扮冇事呢！係！我明白父母表面扮冇事勉強相處其實大家都已經好辛苦，個重點都係希望犧牲自己而令細路仔可以喺個所謂健康完整家庭成長，但係咁樣嘅模式其實你估細路仔真係感覺唔到咩！細路仔都咁受唔到父母之間有愛，咁係咪真係健康同埋完整呢！與其係咁，一係父母之間徹底諗清楚點樣去相處改善整個家庭嘅關係，如果唔係不如灑脫一啲教細路仔點樣去面對，令佢哋雖然要面對雖然父母分開，但係仍然可以得到父母完整嘅愛。用犧牲自己你為咗仔女可以喺所謂健康完整家庭成長，其實大部分時間到頭來仔女嘅成長都唔係一個健康家庭入面發生。因為喺咁樣嘅家庭環境入面，其實父母自己根本都唔開心，又點樣令到仔女獲得真正嘅開心呢！