（長文-純個人分享）
一嚟到就好似要俾下馬威我哋，d語氣勁差，又話我哋唔準備好，話我哋對阿B唔好。作為第一次新任產婦，如果我乜都識，我請你做乜。同佢講可唔可以語氣尊重番d，佢就話佢直腸直肚，係我接受唔到人哋意見。好啦，噤佢開始入去廚房，就話要lee樣要嗰樣，又話要多一個煲，又話要長嘅木筷子。要我屋企人喺噤搵俾佢。 跟著佢喺無問過我哋嘅情況下，喺噤執廚房d嘢嚟就佢自己。
本來簽約嗰陣諗住佢可以多d時間照顧BB同埋我，加上我對食無要求，諗住叫屋企人幫手買d普通豬肉同菜，陪月佢就可以每日早d嚟屋企照顧我哋。 點知佢見到屋企人買d肉，就話lee樣唔好，嗰樣唔好，要‘教’屋企人買d乜第一刀，三叉骨嗰d肉。屋企人嘗試去買，佢又話買得唔靚。過咗幾日，我見屋企人已經好攰，所以決定叫番嗰陪月自己去買餸。點知同佢講時，佢話要諗吓先，話2個禮拜後先買。我嗰吓真係呆咗。第二日再同佢講叫佢買餸，佢再次話諗吓先。我哋咪問佢要諗d乜，佢話佢腳痛。我問如果有架購物車對佢有無幫助，佢就話佢買嘢一定有購物車。噤我哋請佢下星期三開始買餸啦，佢無拒絕。我哋問d錢想點樣處理，佢買完俾單我實報實銷，定係點。 佢就話俾$2000俾佢先，之後會俾番單我。噤好啦，到咗星期一(星期二係佢放假），臨走時我就去俾$2000佢，請佢星期三幫忙買餸。點知佢又話不如星期四先買，我唯有問佢如果佢如果佢腳痛買唔到餸，有無人可以幫佢買，佢就話叫我屋企人買住先。（大佬，我屋企人唔係你工人囉！同埋我認為買餸係佢職責之一）結果我要問佢，如果佢做唔到這項工作，有無其他人介紹可以做到。佢聽完就嬲爆爆攞咗$2000走咗。（我同佢講拜拜佢都唔理我）結果由星期三開始，佢有幫手買餸，我先放心d。
我都唔知lee個陪月係咪無常識定係點。我已經唔係成日都望住佢（通常我去咗休息），但都竟然有幾次俾我見到佢抱住阿B入廚房，重係要有開住火嘅煮食爐喺入面嘅廚房。同佢講唔想BB入廚房，佢就成日都唔記得。我要次次都企喺廚房門口問佢要乜，佢先好似記得。
另外，佢煮嘢食，煲湯嗰d，係好快手。 不過快嘅背後要付出代價 -d爐頭同煲全部都俾佢整到好污糟，係洗唔甩嘅污漬。我本身有個不銹鋼鑊，佢就講咗唔止一次不銹鋼鑊唔好用。有一日，我坐喺廳望緊阿B，突然聽到陪月係廚房大嗌，我即刻去睇乜嘢事。原來佢揸住隻鑊着晒火，嚇死我。佢搵另一個煲蓋蓋住個鑊，好彩整息到d火。之後佢又再話不銹鋼鑊唔好用。我見到隻鑊燶晒。之後佢用咗我差唔多半枝白醋，我估佢用嚟洗個鑊。結果個鑊到宜家都重有d黑色喺鑊底。
重有其他不如理想嘅事發生咗喺lee個陪月身上。總括而言，個人覺得係請咗一個有基本照顧BB知識嘅廚師，而唔係請咗個陪月。
如果有人希望請個陪月要識煮好多唔同餸，唔介意之後換過晒d煮食用具，又唔介意個陪月會遲咗理個BB，係可以考慮lee個陪月嘅。
發表於 
返回列表
