少年成長今日: 0|主題: 16132

收藏本版

發帖

返回列表

跳至頁

查看: 33602 | 回覆: 5

決定重考 [複製鏈接]

csir3290

子爵府

積分: 12795

1^#

發表於 24-6-23 10:56 |只看該作者 |倒序瀏覽 |打印

上星期講到細佬學校要重考其中一科，啱啱早幾日學校又正式發咗一份通告，詳細講重考嘅範圍，雖然範圍據細佬講係畀原本少咗少少，但係由於喺考試最後一日先至重考，咁即係同原有考嗰科嘅考試時間相隔咗差唔多兩個星期，所以細佬話其實重考都係要再溫過。但係今次份通告就加咗新資料，就係話如果學生因為特別理由而唔參與重考嘅話，學生可以提供證明例如好似家長信向學校申請，如果學校批準嘅話就會用佢平時嘅成績嚟推分。不過據細佬講其實班主任都同佢哋講過，學校原則上都係希望佢哋全部學生重考，所以我哋覺得今次加呢個新嘅資料落去，都係為咗想塞住小部分學生家長把口，叫做畀個程序大家，如果想唔重考嘅都可以申請。

我同老婆其實個立場一向都好清晰，就係唔贊成重考，因為唔想增加細佬額外嘅考試壓力。不過最終參唔參與重考，其實都係細佬自己嘅決定。我哋問細佬，佢把口就當然係話唔想重考，但係因為佢班主任又同佢哋講過話，原則上如果冇特別原因都希望佢哋全班都重考。咁所以細佬話想返去學校，問下同學睇下有冇同學都唔參加會交家長信。咁其實我同老婆都尊重佢嘅諗法，我哋同阿仔講話會幫佢寫定家長信，佢自己決定最後交唔交啦！喺封家長信入面，其實我哋都冇寫乜嘢特別嘅原因，因為我哋唔會講大話隨便作一個原因就同佢請假唔考，所以喺封家長信入面我哋都寫得好清楚係因為唔想額外增添學生考試嘅壓力，所以決定畀阿仔唔參加重考，而喺重考當日請假一天。當然封家長信我哋係寫得好正式，希望學校批準申請。我哋將封家長信寫好咗之後就交咗畀細佬，同細佬講話佢自己決定重考又好唔從考又好，我哋都尊重佢嘅決定。因為我哋都解釋畀佢聽，其實最主要我哋嘅考慮唔係考慮分數，而係考慮佢嘅考試壓力同埋佢嘅心情。細佬收咗封信之後就話返去睇下同學嘅情況，之後我哋就冇再跟進。直至到交信嘅最後限期嗰日，我哋放工返到屋企問細佬最後有冇交信。細佬話最後都冇交，因為佢嗰班好似冇同學有交，個個雖然唔鍾意但係個個都冇遞信話唔參加重考。所以我覺得細佬最終有少少屈服咗喺群眾壓力之下，最終都係冇交到封信而繼續參加重考。不過正如我之前講，其實我都估細佬應該都係會參加重考，雖然把口就話唔鍾意或者唔會再溫，但係其實以佢嘅性格去到考之前佢都係會再溫習。

喺呢件事上面我哋希望細佬知道其實我哋係支持佢嘅諗法，我哋最關心嘅唔係佢嘅分數。正如我成日都講，去到呢個年紀嘅細路仔，其實家長只係應該提出意見畀佢參考，最終嘅決定權應該係佢自己手上，就好似今次重考咁，佢自己知道如果唔參加重考嘅後果就係會用平時嘅分數嚟推分，得出嚟嘅分數可能有機會畀佢考出嚟嘅成績差少少，而且可能會比學校覺得佢唔合作，同埋可能要承受一種與眾不同嘅壓力，因為佢冇同學唔參加，如果只係佢自己交信就好似好特別咁，但係另一方面就唔需要承受額外嘅考試壓力，而且仲可以放多日假添。而參加重考嘅話就當然係要溫多一次，同埋覺得條氣唔係咁順囉！佢最終選擇到冇交信雖然浪費咗我哋封家長信，但係我哋一啲都冇覺得唔開心，因為呢個決定係經過佢自己考慮，最終自己嘅選擇，而且佢既然選擇得重考佢就一定會再溫習過。喺呢件事上面我覺得其實細佬應該感受到我哋對佢嘅支持，同埋將來佢亦都應該會更加願意同我哋分享佢嘅睇法，同埋更願意去承擔責任同作出決定。

幾日之後佢考完重考返嚟，佢第一樣就係講原來佢嗰級有三個同學都冇參加重考，佢而家就話早知佢都一齊交信啦，真係畀佢激死！