少年成長今日: 0|主題: 16132

收藏本版

發帖

返回列表

跳至頁

查看: 22101 | 回覆: 1

閱讀 [複製鏈接]

csir3290

子爵府

積分: 12797

1^#

發表於 24-7-14 11:15 |只看該作者 |倒序瀏覽 |打印

上星期講開就嚟放暑假，阿仔阿女已經開始做緊佢哋嘅暑期功課，呢輪其中一樣佢哋用得最多時間嘅就係睇書，因為呢個暑假佢哋都要交幾份嘅讀書報告，幸好佢哋睇書我哋從來都唔需要擔心，因為佢哋平時都自己睇開書。阿女仲犀利到只係個幾禮拜已經睇曬全套四本嘅神鵰俠侶，連我老婆都話當年佢都要用兩個幾禮拜先睇得曬。更加欣賞嘅係佢哋做讀書報告都真係認真睇曬要睇嘅書，唔似得我自己細個嘅時候，所謂做讀書報告，都只不過係睇咗書後面簡單嘅內容介紹，然之後就吹水作咗個報告出嚟。佢兩個而家雖然都係要做幾份嘅讀書報告，但係我見到佢哋每一本書都係睇曬先至做，唔似得我以前細個讀書嘅時候咁懶。

講開培養佢哋閱讀習慣，其實都係由佢哋細個嘅時候暑假開始做起，其中一樣最緊要嘅就係趁佢哋細個嘅時候成日帶佢哋去圖書館。我自己嘅經驗係覺得要細路仔鍾意睇書有兩樣嘢好重要，第一就係要細個嘅時候，家長要同佢哋一齊讀一齊睇，好似講故仔咁，令到佢哋覺得吸引；第二我覺得最重要嘅就係喺佢哋鍾意睇書呢個習慣之前唔可以畀手機佢哋玩。因為當佢哋一接觸手機，一經歷過手機入面嘅內容之後，就唔會有任何書本嘅內容比手機更加吸引，到時你要培養佢哋閱讀習慣就真係難喇！因為就算書本印刷得幾吸引，繪圖畫得幾靚都唔會夠部手機吸引。所以喺細個嘅時候，一定要佢哋接觸書本，仲要家長用時間同佢哋一齊睇，更重要嘅真係唔好無時無刻都畀手機佢哋。如果你以為想佢哋安靜就畀部手機佢哋，其實到頭來只不過係令到細路仔失去咗其他好多樂趣，而且好似上癮咁，郁啲就發脾氣直接到你畀部手機佢為止。

好似上星期咁講，佢哋讀幼稚園開始放暑假我哋就會攞兩至三星期大假，陪佢哋一齊放，除咗希望培養佢哋學習常規之外，仲會用時間培養佢哋閱讀嘅習慣，所以經常會同佢哋去圖書館睇書，亦都會第一時間幫佢哋申請借書證，等佢哋嘗試自己借書，每次都會借十幾本書擺咗喺屋企，冇嘢做嘅時間就會攞啲書嚟睇。另外，我自己覺得書唔需要放得好整齊，本本書都擺曬喺書架，反而應該啲書係放曬喺唔同嘅地方，細路仔可以隨手隨時隨地都攞到嘅地方，好方便佢哋攞到嘅話，自自然然佢哋隨時就會攞到啲書嚟揭。就算唔係睇都好都起碼係可以攞到書嚟消磨時間，而唔係郁啲就攞手機或者開電視。除咗隨時隨地可以揭書之外，亦都要有固定嘅睇書時間。好似嗰陣時我對仔女咁，夜晚食完飯之後大約八點鐘到就一定係熄曬電視全家坐喺度睇書，細個嘅時候就同細路仔一齊睇，讀畀佢哋聽講故事，慢慢大啲就調返轉佢哋講故事畀我哋聽，到再大啲就係各自睇自己嘅書。雖然係各自睇自己嘅書，不過都係要靜靜地全家都一齊睇，唔可以細路仔就自己睇書，家長就揸住部手機喺度轆。慢慢就自然可以培養到佢哋閱讀嘅習慣。

講到培養閱讀習慣，圖書館就真係一個好地方，所以我對仔女細個嘅時候，我哋都經常同佢哋去圖書館，因為就算我哋點買都唔會有圖書館咁豐富嘅藏書，可以畀佢哋接觸到唔同種類嘅書，因為就算我哋買都只不過係按佢哋興趣買書畀佢哋睇，但係圖書館就可以接觸一啲佢哋之前未必有興趣嘅種類。雖然而家佢哋兩個都開始大個，已經少去咗圖書館好多，但係以前細個喺圖書館培養到嘅習慣，而家都仲仍然受用緊。而且夏日炎炎圖書館亦都係一個消暑嘅好地方。不過都係提醒家長去圖書館，除咗係培養閱讀習慣嘅地方之外，亦都係培養細路仔守規矩嘅好地方。家長千祈唔好帶咗細路仔入圖書館之後就放養佢哋，其實入咗圖書館之後家長都係需要陪住細路仔同佢哋一齊睇書，唔好畀佢哋跑嚟跑去嘈喧巴閉，更加緊要嘅就係攞完一疊書睇完之後，要放番去原來嘅地方。因為實在見過太多次喺圖書館嘅檯面同地下都放咗一疊二疊啲細路仔睇完嘅書。圖書館係一個好好培養閱讀習慣嘅地方，家長真係需要好好利用呢一個好地方！