婦女醫護今日: 0|主題: 34372

收藏本版

發帖

返回列表

跳至頁

查看: 26638 | 回覆: 12

卵巢畸胎瘤手術分享 [複製鏈接]

JRS

洋房

積分: 63

1^#

發表於 23-5-29 08:38 |只看該作者 |倒序瀏覽 |打印

本帖最後由 JRS 於 23-5-29 22:27 編輯

知道自己要做手術時非常擔心，不停上網爬文得到好多幫助。而家做完手術幾日，好想趁記憶猶新時留下分享，希望幫到有需要的人：

沒有不適，定期身體檢查時照左肚皮超聲波，發現卵巢有大size瘤，立即去婦科做陰超照清楚，發現左右都有約6cm瘤，醫生話應該係畸胎瘤，要盡快做手術。如果唔做，個瘤只會不停長大，有機會保唔住卵巢。因我兩邊卵巢都有瘤，如冇左兩邊卵巢，會立即收經步入更年期，但我只係38歲。醫生話會盡力保留我兩個卵巢。

隨即約左兩日後做微創手術，慶幸我已買左幾年醫療保險，錢銀方面沒有擔心。

入院前應該要買定鬆身及低腰嘅底褲，預備出院著嘅鬆身連身裙，有飲管的水杯，女性用濕紙巾，m巾及其他日用品

［手術前一日］
早餐後禁食，入院照電腦掃描（CT）。另外，姑娘黎剃毛及洗肚臍，準備明天做手術，有啲尷尬，但照姑娘指示放鬆就可以。照完CT就可以食野。明早9點做手術，半夜12點後禁食，所以晚餐盡量食飽啲，同埋記得沖個靚涼。

［手術當日］
一早姑娘就叫我換手術袍，推我入手術室。見完麻醉醫生及主診醫生後，落藥，3秒左右我就訓左。醒來已經做完手術。

做完手術麻醉藥散後，止痛藥未發揮效力時好m痛，忍一個鐘左右就會好啲。手術期間已經插左尿喉，冇任何不適。

手術後一直吊住一大包止痛藥水，大約十個鐘左右吊完，期間及之後我都冇痛，亦冇要求止痛藥。佢地話有需要可以要求更加强力嘅止痛藥，但我冇呢個需要。

做完手術卧牀休息6個鐘左右可以較高張牀坐下，肚冇痛，傷口冇痛，但喉嚨偶然會好痕想咳，應該因為手術時插喉管落喉嚨所致，盡量忍住唔咳。此時最好用有飲管的水杯，比較方便飲水。

第一晚姑娘幫我打兩次止血針，吊左兩三包抗生素點滴，醫生有黎睇我，換左敷料，開始有屁放，有食粥水及飲湯，夜晚訓覺換左吊鹽水。

［第二日］
已經可以落床，肚冇痛，姑娘會安排拔尿喉及鹽水，拔尿喉有少少唔舒服但未至於痛，之後都冇咩野。姑娘幫我換衫及著返m巾，叫我試下2小時後去小便。老公黎到扶我去小便，下身有血流出。當日順利屙到幾次小便，有自己在病房行下及曬太陽。血液循環唔夠好，手腳都有啲腫。姑娘有俾消炎止痛及抗生素藥丸俾我。但我冇要求食更强力的止痛藥。佢地話有需要就可以出聲。

手術後頭2日最需要家人貼身照顧，之後開始慢慢可以自理。

［第三日］
昨晚訓得好，6點幾自己起身，自己去廁所，但有少少虛，有少少想暈，但可忍住，自己梳洗後，食正常早餐。仍有血流出，量多左。老公接我出院回家，可以淋浴，食左午餐後又訓。上床落床都未敢用力，要老公扶住。食好多生果蔬菜，晚飯後去左手術後第一次大便。訓覺時容易手腳麻痺，血液循環唔夠好。肚臍位有時會輕微痛及痕。

［第四日］
訓得好好，上床落床可以自己黎，活動能力同體力都大左，又去左兩次大便，證明多食生果蔬菜好有效。食完午餐又訓，好訓得。下身血開始流少左。

［第五日］
體力及活動能力又大左，基本生活自理已經ok, 仲可以蹲下幫個女揸防蚊油，不過仍然會好慢動作，好小心。下身流血量少左。

回家後頭幾日雖然冇出街，但我會揸防曬，然後在窗邊曬太陽，吸下陽氣，等自己精神啲。另外，食好多生果蔬菜，因為我覺得腸胃好先會吸收營養，先可以養好身體。飲食方面以清淡為主，戒牛，蝦，蟹，雞，無鱗魚，花膠，生冷，油膩，加工或精製食物。

發帖嘅今日就係手術後第五日，因為覺得成個過程都算不幸中嘅大幸，所以好想多謝上天保佑及回饋返俾社會，希望我嘅分享可以幫到有需要嘅你。加油！

另外提醒大家記得定期做婦科檢查，最好係陰道超聲波，仲要盡早安排買醫療保險，人到中年係好需要，祝福大家都身體健康！