少年成長今日: 3|主題: 16108

收藏本版

發帖

返回列表

跳至頁

查看: 13474 | 回覆: 0

博物館 [複製鏈接]

csir3290

子爵府

積分: 12552

1^#

發表於 22-8-14 09:26 |只看該作者 |倒序瀏覽 |打印

早幾日趁有半日假期就同對仔女專登去西九文化區M+博物館參觀，西九文化區就已經經常去但係啲博物館都係第一次入，因為又要預約又人多，到終於開咗故宮文化博物館，M+嘅人流即刻少咗亦都容易約咗，入到去真係覺得好靚好多嘢睇，第一次喺香港嘅博物館行嘅時候會有覺得去咗外國啲博物館的感覺，所以真係值得帶啲細路仔去睇。

天氣咁熱啲細路仔又通常放下晝或者係放假，所以去博物館真係成為一個消閒又消暑嘅好地方，再加上原來我而家先知大部分嘅博物館都係免費，所以好多家長都會帶埋啲細路仔去博物館參觀順道消吓暑。但係我想講係有啲家長當咗博物館係遊樂場，入咗去之後就由得啲細路自己四圍走四圍跑，嘈喧巴閉，明明有啲人入去博物館係想靜靜地咁睇吓嘢行吓，但係總係會遇到啲細路仔喺前面嘈喧巴閉又或者行到好埋去睇嘢，再加上啲家長又要同佢哋打卡影相，搞到有陣時想企喺度詳細啲睇下啲介紹都唔得。

其實有一啲嘅博物館真係唔適合帶啲年紀比較細嘅細路仔去，好似嗰日我喺m+就遇到起碼四五個，我諗都係3，4歲嘅細路仔睇下睇下覺得悶就喺度扭計喊住想走，總之成層樓都聽到個細路仔喊，而且博物館係畀細路仔擴闊眼界嘅好地方，所以入博物館除咗學嘢之外更加需要教細路仔入博物館嘅禮儀。首先最重要當然係要教佢哋博物館唔係遊樂場，入去博物館第一件事千祈唔可以嘈喧巴閉亦都唔可以四圍走，做家長可能未必懂得教佢哋去欣賞啲乜嘢藝術品，或者教到佢哋好多博物館入面展品嘅資料，但係就可以教到佢哋慢慢細心揀自己有興趣嘅展品慢慢睇。除咗唔好騷擾人之外亦都要教佢哋睇展品嘅時候唔好黐曬落去件展品度應該要企開少少等其他人都可以睇到啲資料，家長亦都要注意博物館唔係打卡嘅地方，並唔需要件件展品都要行埋去影相，而影相嘅時候仲要左右隔離嘅人讓佢哋，有陣時想睇下件展品但係左右都有人影相，最慘係影相啲人嘅眼神仲好似畀緊壓力你，好似你阻住佢哋影相咁。

所以去博物館之前其實家長都有需要同啲細路仔講下入到博物館入面應該要注意嘅規矩！當然家長嘅身教都好重要，當日我就見到有兩三個媽媽帶住幾個細路仔入咗去博物館之後，嗰兩三個媽媽就自己坐低坐埋一邊傾偈，然之後就由得嗰幾個細路仔喺度當博物館係遊樂場玩「捉伊因」咁走嚟走去。如果要畀細路仔放電請去遊樂場但係博物館並唔係一個遊樂場。家長如果懂得利用，根本博物館係可以教到細路仔好多唔同嘅嘢，除咗知識上面嘅嘢之外亦都可以教到佢哋好多禮貌上面或者規矩上面嘅嘢，更加重要仲可以培養到細路仔嘅品味。但係可惜就係有啲家長只係將博物館當成一個免費遊樂場而白白錯失咗利用博物館去擴闊細路仔眼界學習品味學習禮儀嘅好地方同好機會。