少年成長今日: 3|主題: 16108

收藏本版

發帖

返回列表

跳至頁

查看: 11047 | 回覆: 0

律己寬人 [複製鏈接]

csir3290

子爵府

積分: 12552

1^#

發表於 22-5-15 11:30 |只看該作者 |倒序瀏覽 |打印

早輪睇新聞，可能大家真係冇乜地方好去，連下城門水塘乾咗都大把人擁到去個乾咗嘅塘底度影相打卡。明明寫住水塘範圍不准進入，都仲有好多家長帶埋細路仔特登爬落去個水塘底度影相。新聞重訪問一個細路仔問佢驚唔驚危險，個阿媽搶住答話佢哋會好小心睇清楚情況先至帶佢哋落去，但係見到個細路仔就有少少尷尬。最慘就係記者訪問佢哋嘅位置就係一條違規爬落去嘅水渠位。家長為咗張打卡靚相，硬係要啲仔女沿水渠爬落去，危險之餘，仲乜嘢叫守規矩都忘記曬。

早幾日長假期又試過喺啲商場度啲家長又係為咗張靚相，明明商場啲裝飾寫住請勿攀爬同請勿踐踏，但係啲家長就硬係要啲細路仔企上啲裝飾度影。冇錯係張相好似靚啲，但係連個細路仔都識得望住阿媽同佢講寫住唔踩得，阿媽通常嘅回應就係好快脆唔驚啦！咁教細路仔即係原來只要好快脆，唔會整爛就唔洗守規矩。

啱啱又喺網上面睇到條片，一對父母同個細路仔同埋工人大鬧「壽司郎」嘅片段。我明壽司郎排隊排得耐就係人都知，只要有位唔理坐邊度都立即走入去我又明，但入到去見到有人走，個位靚啲又要人即刻換畀佢，人哋按規矩做唔肯就鬧到全場都聽到，係咁話人啲規矩唔夠彈性，以佢嘅邏輯乜嘢叫彈性呢，就係順佢意方便佢就叫做彈性，咁呢個又乜嘢玩法呢。最慘係搞到個細路仔同埋個工人都尷尬。細路仔將來大啲如果喺網上面再見到呢條片唔知會唔會覺得羞家呢。壽司朗出名因為排隊排得耐只要上網睇下大把壽司郎嘅食客醜態片段。但係壽司郎嘅職員都已經好有禮貌同埋佢哋都係跟規矩做，你入得去食就要跟入面嘅規矩去做啦！原來守規矩又係要睇下方唔方便自己同對自己有冇好處呢！

好多家長就係咁矛盾，口中就成日要教細路仔守規矩，喺佢哋眼中見到人哋唔守規矩就犯咗彌天大罪咁，但係自己唔守規矩就諸多藉口，細路仔喺呢啲家長嘅教導之下其實都幾矛盾，究竟乜嘢係啱乜嘢係唔啱呢。學校要學守規矩返到屋企就要學守規矩要有彈性，對細路仔嚟講真係越學越混亂。見到紅燈究竟過唔過馬路好，老師話唔過但阿媽就話冇車就過，究竟過定唔過呢？老師話守規矩好重要但係阿媽話打卡影張靚相更加重要。學校話對人要有禮貌要寬恕要有氣量，家長話總之對自己唔好就要惡過佢大聲過佢，總之對自己有利就係啱唔需要講禮貌。細路仔真係越學越矛盾。其實「嚴人寬己」只會搞到細路仔越來越奄尖同埋小氣，做家長尤其是細路仔喺身邊就更加要提醒自己要時刻要做細路仔嘅榜樣，因為細路仔喺家長身上就學到將來嘅自己。所以做家長時刻都要「律己寬人」，咁細路仔自然能夠喺家長身上學到守規矩同埋學到氣量。