少年成長今日: 0|主題: 16132

收藏本版

發帖

返回列表

跳至頁

查看: 11317 | 回覆: 0

壞脾氣之源 [複製鏈接]

csir3290

子爵府

積分: 12795

1^#

發表於 22-5-22 11:13 |只看該作者 |倒序瀏覽 |打印

早幾日行過公園，喺好嘈雜嘅環境當中都聽到有個女人好大聲咁喺度鬧緊人，吸引到好多人都望過去，原來係一個阿媽係到鬧緊仔，個細路亦都不甘示弱，不停好大聲咁喺度喊同埋扭計，個阿媽好似情緒失控咁，越鬧越大聲越嚟越控制唔到自己，後來有啲路人都睇唔過眼行埋去勸佢哋。我只係行過冇再理亦唔知之後跟住點。

我明白你嗰陣時湊細路真係好辛苦，細路有陣時喺街扭計亦都係令人好煩厭，但係呢個時候做家長嘅就應該要更加有自制能力，有啲細路仔唔係你大聲佢就會聽，真係亦都見過有啲越鬧越大聲。我明白有陣時有啲細路仔可能真係情緒上面有問題，所以脾氣會一發不可收拾，但係我覺得更多嘅其實係因為父母本身脾氣都好大，細路仔喺父母身上學返嚟。有一日湊阿仔返學，喺佢學校附近就有見到有個細路仔喺度發曬脾氣係咁鬧個菲傭，應該係個細路仔唔記得帶嘢，但係佢就將個責任怪咗落個菲傭身上係咁鬧佢，我見到個工人姐姐其實都好無奈，而且又真係唔敢鬧返轉頭。個細路仔係唔啱，但我更相信嘅其實係根本個細路仔嘅屋企人喺屋企都係咁樣對個工人姐姐。而我更加覺得個細路仔一路長大脾氣都唔慌會好得去邊。

做家長除咗要經常提醒自己要守規矩要做榜樣之外，亦都要經常在意自己嘅情緒同埋脾氣，因為呢啲好容易就會帶咗落個細路仔身上。講真正常細路仔細個可能脾氣大，但係如果家長細個開始已經很耐心教導，其實情況應該會有改善。我自己個仔細個都係脾氣大，好容易就會發脾氣亦都試過喺街度扭計，但係我知道大前題係我一定唔會同佢喺街度嘈，如果扭計就即刻返屋企，返到屋企我先至會罰佢。當然之後亦都會慢慢同佢講番，慢慢其實我個仔嘅脾氣亦都改善咗好多，到而家基本上佢係唔會點發脾氣。細路仔嘅脾氣好多時都係嚟自家長，細路仔見到家長事無大小都係發脾氣，唔鍾意嘅時候就鬧人或者覺得你做錯嘅時候淨係識得鬧，想用脾氣解決問題，而其他人就怕咗佢，細路仔亦都好容易會學到咁樣處理，因為佢覺得咁樣就可以解決到問題。佢哋嘅家長都係有嘢嘅時候就大聲鬧，細路仔就係咁樣解決問題嘅方法又點會唔大脾氣呢？其實我哋都明白有情緒係正常嘅，每一個人都會有，但係點樣處理自己嘅情緒先至係最重要，父母都唔識得心平氣和，細路仔又點會識得呢！要管好細路仔嘅情緒，大人就先要管好自己嘅情緒，如果唔係細路仔都只會係畀自己嘅情緒帶住走，影響佢之後嘅發展同埋同人嘅相處。

0 0 0

私人傳訊

跳至頁

返回列表

回覆

發帖

熱門搜尋：

少年成長 今日: 0|主題: 16132

瀏覽過的版塊

少年成長今日: 0|主題: 16132