少年成長今日: 3|主題: 16108

收藏本版

發帖

返回列表

跳至頁

查看: 15191 | 回覆: 0

有乜嘢好比較呢！ [複製鏈接]

csir3290

子爵府

積分: 12552

1^#

發表於 22-3-20 10:56 |只看該作者 |倒序瀏覽 |打印

之前曾經講過兄弟姊妹嘅感情，有陣時係父母唔為意咁破壞咗。其中一個父母可能經常會唔為意嘅部分就係將佢哋之間做比較。好似我自己細個咁。我爸爸就經常話我比較懶但係有小聰明，我細佬就好勤力。可能間唔中佢哋好不經意嘅說話，但係其實我記咗成世。如果兄弟姊妹間有一個讀書比較叻啲，咁啲父母好多時就會話冇咁叻嗰個點解唔學吓叻嗰個。又或者總係話冇咁叻嗰個懶啲。又或者有個比較乖啲有個可能比較活躍啲，好多時就會話點解唔係好似邊個咁乖。其實呢啲說話無形中都製造緊兄弟姊妹間嘅矛盾。有啲家長其實都開始會為意到唔好同其他細路仔比較，但係偏偏就唔記得咗其實兄弟姊妹間就更加唔應該比較。比較已經唔好，如果畀其中一個覺得父母偏心或者錫另一個多啲嘅時候，就更加破壞佢哋之間嘅感情。

其實根本冇乜嘢值得好比較，因為每個人都係獨立個體，每個人嘅性格同埋長處都唔同。可能父母多數都係著眼於讀書叻唔叻，成績好唔好，勤唔勤力，乖唔乖呢啲因素上面。但係其實每個人嘅長處都唔同，如果家長懂得欣賞兄弟姊妹間各自嘅長處，其實反而會助長佢哋互相學習而唔係互相妒忌。好似我對仔女咁，明顯家姐嘅讀書成績就好過細佬，但係我哋喺欣賞家姐之餘，都會鼓勵細佬，其實佢兩個我哋都唔會做啲乜嘢比較，都係鼓勵佢哋要超越自己盡自己能力。另一方面，細佬又會善解人意個家姐，細佬好多時都會諗埋人哋嘅感受，尤其是佢會照顧埋家姐。細路畫畫叻啲，家姐就音樂叻啲，其實佢兩個都有各自自己嘅長處同埋缺點，我哋要做嘅唔係要佢哋互相比較，反而係希望佢哋互相學習。要做到咁家長平時就要注意自己嘅說話同埋態度。其實只有經常給予正面鼓勵，欣賞佢哋嘅長處先至會教導到佢哋互相學習。細路仔好聰明見到家長讚另一個嘅時候，佢就會知道原來家長欣賞邊方面嘅長處，佢哋自然就會模仿，因為細路仔都係渴望被讚賞被鼓勵。我唔相信有一個細路仔會係冇優點，所以只要家長適當發掘佢哋嘅優點經常作鼓勵，而唔係經常抬高某一個而踩低另一個嘅時候，自自然然佢哋就會學到互相學習大家嘅優點。為咗兄弟姊妹關係同感情，家長真係切記唔好將佢哋互相比較。