少年成長今日: 3|主題: 16132

收藏本版

發帖

返回列表

跳至頁

查看: 17247 | 回覆: 0

困獸鬥 [複製鏈接]

csir3290

子爵府

積分: 12797

1^#

發表於 22-3-6 10:55 |只看該作者 |倒序瀏覽 |打印

如無意外我相信三月初開始大部分返寫字樓工作嘅人都應該要在家工作配合政府嗰個強制檢測。當大部分家長都要在家工作嘅時候，好多時都會衍生一個問題，就係仔女嘅學習時間同埋玩嘅時間同家長嘅工作時間重疊咗。以前家長係公司做嘢，咁細路仔就算網課都好，俗語講「眼不見為乾淨」，但係而家全屋困獸鬥，自自然然就會產生好多磨擦同埋唔協調，當中好多其實係仔女習以為常嘅習慣，以前家長因為見唔到所以可能覺得冇問題，總之放工返嚟見到佢哋做齊功課就冇問題啦！但係而家就樣樣都係問題。

所以今次疫情其實揭露咗一個問題，就係好多家長當冇事嘅時候就以為只要將個仔女交咗畀學校自己就可以乜都唔理，但係而家個個都要work from home，細路仔要網課之餘仲要長期喺屋企嘅時候就出現咗好多問題，其中最主要嘅係生活冇規律嘅問題。本來應該要喺細路仔仲細嘅時候，就已經要好在意幫佢建立生活規律，如果冇，本來以為冇問題，但點知會有在家工作呢樣嘢呢！

我記得我對仔女好細個仲讀緊幼稚園開始，每年我同老婆都會攞大假，目的最重要唔係同佢哋去玩，目的就係幫佢哋建立學習同埋生活嘅規律。幾時學習同幾時玩其實都應該有規律，細路仔越細個開始幫佢建立到學習同埋生活規律嘅時候，佢每一日就會跟住呢套規律去做，咁到嘅將來長大嘅時候，其實問題都會少啲。要幫佢哋建立生活規律，我成日強調唔係得把口講要佢咁樣要佢咁樣，喺開始嘅時候真係要落手落腳陪佢哋一齊去建立呢個規律。就好似而家，我全屋兩個大人要在家工作兩個細路要在家網課，其實係朝早嗰段時間其實細路上緊網課，根本從來唔會騷擾我同老婆做嘢，而且佢哋要跟足學校嘅規舉，唔可以隨便行開甚至去玩，直至到佢哋上完網課，咁我哋會一齊食晏佢哋會休息一陣間，咁我哋都會襯食晏嘅時候休息一陣，咁之後佢哋就會自己做功課，我同老婆就會繼續自己嘅工作，直至到佢哋兩個做完功課，只要見到我同老婆都仲未開房門嘅時候，佢哋就知道我哋仲做緊嘢，佢哋就會自己玩當然係執好曬啲功課，尤其是係細佬預備畀我老婆睇。而家姐其實我哋已經唔再需要幫佢睇功課佢自己會搞掂。

有啲家長話去到咁大個好難改，又或者唔知點同佢哋講好，其實去到大個咗嘅細路真係要慢慢同佢哋傾，你都要等佢哋明白其實家長係喺度做緊工作，當然如果佢哋好合作，咁家長自自然然亦都要有一啲嘅讚賞。其實而家雖然個個都在家工作，可能都會擔心細路仔騷擾。其實我覺得只要家長EQ高啲，其實正正多一個好機會慢慢調較返細路仔學習同埋生活嘅規律。要知道如果細路仔係長大嘅過程入面根本從來冇幫佢建立呢啲合適嘅規律嘅時候，佢哋根本就冇概念究竟要點樣做先至啱，或者乜嘢叫做規律，家長口中淨係叫佢哋溫書，如果家長只係事無大小開口鬧，其實成個屋企嘅氣氛都會好差，細路仔亦都可能只係喺你鬧個刻會暫停一陣，但係鬧嘅效果只會越嚟越低。與其係咁，不如嘗試同仔女好好地去傾一個工作計劃，每一日嘅工作應該點樣處理。另外，喺上課期間如果遇到問題嘅時候，其實唔需要即刻搵家長處理，佢哋應該嘗試自己處理，做功課如果唔識嘅時候其實平時家長返工嘅時候，佢哋都係自己做，直到家長返嚟先至可以問，佢哋應該學習自己處理問題。因為佢哋應該都要知道其實家長就算在家都係返緊工，家長都有家長嘅問題要處理。總之大家要心平氣和去解決問題，既然已經困獸鬥，仲要畀情緒主導一切就根本冇可能解決問題。家長要知道其實細路仔今日嘅生活規律問題，其實都係同家長之前嘅處理有關，既然係咁，解決問題係需要時間唔係需要情緒，不如好好地同仔女傾一套合適嘅處理方法仲好。當仔女感受到家長心平氣和同埋講道理嘅時候，其實仔女多數都願意合作。不過當然正面嘅鼓勵同埋積極嘅支持都好重要。情緒係唔可以解決問題，只會令問題越嚟越加深同惡化，既然而家社會嘅大環境同埋氣氛已經係咁唔好嘅時候，點解唔可以喺自己屋企入面盡量令到個氣氛好一啲呢！

0 0 0

私人傳訊

跳至頁

返回列表

回覆

發帖

熱門搜尋：

少年成長 今日: 3|主題: 16132

瀏覽過的版塊

少年成長今日: 3|主題: 16132