少年成長今日: 0|主題: 16132

收藏本版

發帖

返回列表

跳至頁

查看: 14264 | 回覆: 0

自己温習 [複製鏈接]

csir3290

子爵府

積分: 12797

1^#

發表於 21-12-5 10:41 |只看該作者 |倒序瀏覽 |打印

細佬剛剛考完試，搞掂咗家姐升中之後而家又到細佬開始面對呈分試。我同老婆相對都比較緊張，因為細佬嘅成績一向都冇家姐咁好，但係今次細佬考試我哋幫佢溫習嘅時間反而覺得輕鬆咗。唔知係咪細佬自己都有目標，佢好想入埋去家姐嗰間中學，因為細佬覺得家姐間中學好似好好，對同學仔又好關顧，更重要嘅係細佬好想同家姐同一間中學讀書。所以今次考試細佬明顯變得主動溫習，好多時佢都主動同我哋講話要做啲乜嘢補充同溫習啲乜嘢。另外以前家姐同埋細佬溫習嘅時候好多時都要我哋兩公婆同佢哋問書，但係今次考試，細佬自己一組將要問同埋要默嘅內容自己錄曬喺部手機度，一得閒就聽然之後自己默。家姐亦都好幫手，細佬唔得閒嘅時候就幫細佬錄定曬啲題目。所以我琴日同我老婆傾開，大家都覺得細佬溫習變得主動咗。而且亦都識得用方法去溫習。

其實作為家長，我覺得與其幫佢溫習不如襯佢仲細嘅時候開始教佢主動溫習同埋溫習嘅方法。正所謂與其同佢一齊溫不如教佢溫嘅方法等佢自己可以做到。我自己記得細個嘅時候，我爸爸媽媽都係成日叫我溫習，但係我自己總係唔知道究竟乜嘢叫做溫習，淨係知道當佢哋叫我溫習嘅時候，我就打開本書放喺枱面讀一次，對乜嘢叫溫習嘅概念都唔係太清晰。所以有咗佢兩姊弟，到自己做父母嘅時候其實都好主力覺得要教佢哋溫習嘅方法，即係雖然開頭都幫佢哋溫，但係慢慢放手叫佢哋按照我哋教嘅方法去溫書。尤其是而家姐已經讀中學，更加唔能夠無了期去幫佢溫習，懂得自學先至係最緊要。

作為家長想幫細路仔溫習，除咗開口叫之外，亦都要教懂佢哋溫習嘅方法，更加唔少得嘅就係幫佢哋建立成功感同埋認同感。好似幫細佬咁，我哋開頭會預早少少教定佢學校會教嘅課程當預習，等佢先有個概念，然之後每日返嚟都會叫佢做多兩三題數或者練習，份量一定唔可以多，亦都唔想令到佢增加壓力，但係作為鞏固學習其實佢亦都適應咗呢套模式，再加上默書佢已經習慣咗自己錄低然之後自己喺我哋放工返屋企之前就溫好曬，所以到測驗考試佢都習慣咗呢套溫習嘅模式。最仲要係等佢知道如果自己懂得溫習，咁去到夜晚嘅時候就唔使等到我哋返嚟先至溫，咁佢就可以有多啲嘅休息時間做自己鍾意嘅嘢。所以佢每日都會好快做好曬啲功課同溫好曬啲書，然之後到夜晚或者五點零鐘嘅時候佢就已經可以休息做自己鍾意做嘅嘢。再加上我同老婆成日讚佢咁樣好自律，而佢亦都覺得自己咁樣溫默書有好多成功感，所以慢慢就建立咗一套自己溫習嘅模式。另一方面家姐其實亦都自己建立咗一套溫習嘅模式，所以到而家中學其實我同老婆都已經唔係好需要去理佢啲嘢，測驗考試佢都會用得自己溫習。細佬可能都係有樣學樣，所以今次細佬考試明顯我同老婆係冇之前咁辛苦。

所以家長唔好只係淨係開聲叫佢哋溫習，尤其是係細個嘅細路仔，佢哋根本唔知道乜嘢叫做溫習。與其只係開聲叫，不如趁佢哋仲細嘅時候慢慢幫佢建立溫習嘅模式，我同老婆都相信唯有懂得自學懂得自律，先至可以更加容易適應越嚟越繁重嘅學習生活。要知道細路仔係唔會懂得自己溫習，因為對於佢哋嚟講溫習唔係一件開心嘅事。但係唯有喺佢細個嘅時候陪佢一齊做教佢哋點樣溫習，從中搵到成功感亦都建立到家長對佢哋嘅認同，咁佢哋先至會願意自己去溫習。

0 0 0

私人傳訊

跳至頁

返回列表

回覆

發帖

熱門搜尋：

少年成長 今日: 0|主題: 16132

瀏覽過的版塊

少年成長今日: 0|主題: 16132