少年成長今日: 0|主題: 16108

收藏本版

發帖

返回列表

跳至頁

查看: 19500 | 回覆: 2

有得錫好錫 [複製鏈接]

csir3290

子爵府

積分: 12558

1^#

發表於 21-4-4 09:44 |只看該作者 |倒序瀏覽 |打印

早兩日坐喺梳化睇電視，突然間聽到我老婆話阿女點解成日都冇腰骨，原來阿女嗰日睇緊電視嘅時候又係成個人挨曬落我老婆度。阿女好鍾意睇電視嘅時候成個人挨落我度將個頭墊咗落我膊頭，但係我呢幾日腰骨痛醫生話唔好坐梳化要坐啲硬櫈，所以我成日坐咗喺窗台阿女就變咗要挨住我老婆。

其實我對仔女而家都已經就嚟12歲同埋11歲，但係佢兩個都仲係好鍾意成日攬住我哋同埋挨住我哋，出親街阿仔阿女都會主動拖住我哋或者翹住我哋隻手一齊行。我成日都有個諗法就係趁仲有得攬仲有得拖同埋翹嘅時候，就要盡量去做。當佢哋越嚟越大嘅時候我相信呢啲機會就開始越嚟越少。喺我識嘅朋友入面，我發覺唔係好多父母好似我哋兩公婆咁成日鍾意攬住阿仔阿女，成日有好多緊密嘅身體接觸，唔知係咪中國人教仔女嘅特點，就係唔係好鍾意有身體接觸，細個bb嘅時候梗係多人好多人攬多人錫，但係去到幼稚園或者小學嘅時候開始就越嚟越少。我試過有一次同阿女一齊搭𨋢，阿女又係好自然咁挨住我仲錫咗我一啖，跟住架𨋢入面有個男人就係咁望住我哋，臨出𨋢仲同我哋講話阿女咁錫爸爸添，好似有啲奇怪咁。中國人尤其是爸爸就更加對仔女好似明顯要保持距離咁，但係久而久之就會令到仔女覺得爸爸更加冷漠，關係好似越嚟越疏離咁。有啲人話對仔女要好似朋友咁，但係我反而覺得喺情感上與仔女相處反而要好似情侶咁，喺仔女長大嘅過程中父母先至係佢哋情感上面嘅最大支持。細路仔其中一個早拍拖嘅原因，我覺得正正就係因為佢想搵到情感上面嘅支持同埋慰藉，想感覺到人關心同埋錫！但係唔知點解偏偏好多中國人嘅父母當喺仔女長大嘅過程入面就好似唔係好鍾意同啲仔女有多啲親密嘅接觸，我成日都講要令仔女覺得自己愛錫佢哋，除咗行動表達之外仲要用說話同埋身體接觸你表達。就算父母平時幾照顧啲仔女都唔夠一個擁抱或者錫一啖嘅效果更大。所以唔好覺得細路仔大個就唔需要咁做，反而我覺得應該趁佢哋仲肯畀你攬畀你拖畀你錫嘅時候要盡力去做盡力去表達，如果唔係愈唔做越嚟越難做，到有朝一日發覺距離越嚟越遠或者越嚟越冷漠嘅時候要再做就更加困難。