近排兩姊弟一齊考試，對於我哋兩公婆都要返工嚟講，幫佢哋溫習其實都真係幾辛苦。幸好之前已經開始逐步教佢哋自己溫習，情況先好啲。尤其是而家姐已經六年班所以好多時我都請家姐幫手同細佬溫習，其實所謂幫手都只不過係叫細佬自己溫完習之後，家姐幫手問細佬書。開頭細佬都有啲唔係好願意，但係當細佬知道如果肯俾家姐幫佢問，夜晚佢就可以唔使溫咁夜仲可以有時間玩吓嘅時候，細佬就開始接受。而且佢兩姊弟一向都感情好，有陣時問書好似問到玩問答問答遊戲咁，咁兩個都自自然然慢慢變成咗一種幫手溫書嘅習慣。
另外仲有一個温書嘅好幫手，就係佢哋各自嗰部舊手機。好耐之前已經開始用部舊手機幫佢哋溫默書，就係叫佢哋自己錄低咗要默嘅範圍跟住自己聽住默返出嚟，其實個效果就同我哋夜晚返嚟幫佢哋默一樣，只不過變成係佢哋自己讀畀自己聽。開頭因為可以用手機錄音佢哋覺得好新奇，所以好願意試，試下試下就變成咗個習慣。所以而家無論係中文定英文嘅默書，只要係讀默嘅其實佢哋都會自動自覺錄曬音，然之後每日都可以幫自己溫習。我同老婆返嚟淨係睇下佢哋默成點，因為佢哋連改都係互相去幫對方改。部手機除咗幫佢哋溫默書之外，考試入面其實亦都發揮咗呢個作用。我哋都會先圈低一啲佢哋要識嘅詞語言之後叫佢哋自己錄低咗跟住自己每日默返出嚟。慢慢溫乜嘢科都好，不論係常識又好中文又好，英文又好佢哋都可以自己錄低啲題目然之後自己寫返答案出嚟，喺錄音嘅時候佢哋亦都可以作為溫習咁一路錄一路讀啲題目一路溫習。因為用咗呢個方法，變成咗我哋兩公婆返到屋企嘅時候主要睇下佢哋寫出嚟嘅答案，之後只係重點同佢哋溫返啲佢哋唔識或者錯咗嘅嘢就變成慳咗好多時間。
用部手機溫習除咗慳咗我哋兩公婆嘅時間之外，我覺得另一樣更加重要嘅作用就係令佢哋知道手機係一種工具唔只係玩具咁簡單，其實由畀佢哋接觸手機開始我哋都係話畀佢聽手機係一件工具，係幫助佢哋生活唔係淨係攞嚟玩。當然更加因為佢兩姊弟有太多興趣平日根本就唔會點樣攞住部手機，而家攞得比較多就係攞部手機嚟幫手溫習。手機變成咗其中一個幫佢哋溫習嘅工具而佢哋都感受到咁樣溫習亦都係真係幫佢哋溫得有效率咗。
而家手機咁流行教細路仔用手機並唔係只係簡單畀部手機佢用就算，而係喺開始畀佢哋用嘅時候就就要幫佢哋培養用手機嘅習慣，究竟你只係畀佢攞嚟玩定係教佢哋利用呢部手機作為一件工具呢？其實好睇家長嘅取態，同家長點樣同佢哋開頭，成日都講家長如果一開始只係將部手機作為電子奶嘴而換取佢哋安靜，咁對佢哋嚟講手機就一件娛樂工具，都係嗰句細路仔點樣用手機其實完全係源自於家長點樣教，到家長發覺個細路仔冇咗部手機唔得嘅時候，其實全部嘅原因都係源自於個家長，到時已經想教都難！
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
