呢輪家姐最困擾嘅就係打針。由政府宣布將打針嘅年齡降到12歲開始，其實我哋都開始同家姐商量，因為學校遲早都會問究竟打唔打針，但我哋都感覺到佢有啲困擾，因為家姐真係好怕打針。直至到早兩日學校真係出回條問家長畀唔畀小朋友去打針，家姐即刻好大反應同我哋講嘅時候仲講到想喊咁，所以我哋都仲未決定。
其實講到打針，我同我老婆一開始嘅時候其實都係唔想打，因為始終都係覺得好似有好多副作用，有啲仲好似好嚴重咁。始終都係覺得一隻新嘅藥仲要係咁趕嘅情況之下生產總係覺得好似唔係好安全咁。但係慢慢啲諗法開始有啲改變，當然最重要就梗係想生活回復正常，因為我覺得最終呢一隻疫苗其實都會發展到好似我哋每年打流感疫苗一樣。而且隔咗咁耐全世界都已經打咗咁多，都應該有一定成效。而最重要令我哋開始考慮打針嘅原因，就係覺得政府會開始搞我哋嘅職業，我哋擔心嘅係如果過咗呢個八月底嘅推廣期，政府會再嚴厲啲去處理未打針嘅人，當諗到可能要每個星期驗一驗，咁可能真係打針會方便啲。我同我老婆都係由開頭好唔願意到而家慢慢要接受，甚至book咗期都預備打針。當然會擔心有副作用，但係其實理性啲咁諗，副作用或者嚴重嘅副作用發生嘅情況係咪真係咁高呢？總之而家願意打，其實好大嘅原因係希望免卻日後嘅麻煩，同埋當然係希望盡快可以回復正常除低個口罩啦！
至於家姐其實我哋都開始有同佢傾點解會考慮畀佢打，最主要係擔心日後喺學校嘅生活入面，會對打咗針同未打針嘅學生有唔同嘅對待，當然大部分嘅學生如果冇打針嘅話咁可能佢影響不大；但係當調返轉如果咁大部分嘅學生都有打針，未打針嘅學生成為少數嘅時候，可能學校喺處理一啲學習活動或者返學上面可能都有唔同嘅處理，所以我哋先唔想有咁嘅情況出現。其實一路都有同家姐傾，經過呢兩日其實家姐嘅接受程度都高咗。而家我同老婆嘅諗法係先覆咗學校話會打，但係就唔話俾家姐聽住，因為其實都未知幾時打，然後利用呢段時間慢慢再同家姐傾，況且如果同埋同學一齊可能佢嘅接受程度會再高啲，再加上我同老婆都已經book咗喺佢之前打，希望佢到時會接受。但係如果到時佢真係非常之唔願意，我同老婆都唔會迫佢，最多到時咪同學校講話因為我同老婆都唔得閒，所以之後先同佢自己約。
其實打唔打針真係好睇自己嘅需要，當然信唔信任政府又係另外一個原因，但係睇返個趨勢其實全世界都將會係打針嘅會越嚟越多人，世界亦都會越快回復正常。總之我同老婆而家都要面對現實，除咗為健康之外唔想畀政府搞免除麻煩亦都一個好主要嘅原因。至於家姐，當然我哋會希望可以令佢接受，但係如果到時佢真係好唔願意嘅話我同老婆亦都講咗唔會逼佢，因為始終打針都真係好過人嘅睇法，就算做家長都冇得迫。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
