上個禮拜講家姐打針講到我哋諗住覆咗學校話打先，然之後到真係打嘅時候先至再決定係咪真係去打，嗰陣時都冇諗住咁快決定。點知覆咗唔夠幾日學校就已經即刻派張通告畀家姐通知佢7月2號就要打，咁家姐嗰晚又係好唔願意咁攞張通告畀我哋。咁冇辦法啦，就唯有真係認真地再同家姐傾。我都係同家姐解釋返點解想佢打，同埋另外都係同佢講因為而家打都仲有德國嗰隻疫苗可以用，所以我哋都希望如果可以有得揀嘅話就揀隻比較好嘅。但係我都同家姐講話如果佢真係好唔願意打，咁到時我哋只要同老師講話家長唔得閒陪佢去咁佢就可以唔使打。家姐聽完我哋解釋之後，其實佢個樣都係有啲不情不願咁，但係我哋都叫佢先交咗張通告先，總之到時如果佢唔願意嘅我哋就唔陪佢去，最多同老師講話我哋唔得閒。點知家姐發現因為打針係要夠12歲而家姐仲爭拾幾日先至夠，咁我話我哋照填咗張通告叫佢聽日返去問清楚老師係咪可以打先。
點知第二日佢一放學就已經即刻whatsapp我，話發生咗一件天大要慶祝嘅事，原來就係老師話佢太細個仲未夠12歲所以唔可以打，佢非常之開心。佢成日就喺度話年青真係好！我返到屋企佢都仲係好開心咁同我哋講咗成晚。咁我都同佢講話咁咪好囉！早知嗰陣時唔使咁早唔開心啦！因為老師同家姐講就話佢未夠年紀仲爭十幾日，所以唔可以打。叫佢同家長講請家長自己約時間再同佢打。咁我哋都再同家姐講話如果佢諗清楚自己想打先至出聲啦！之後我哋都再冇跟進，因為我哋都覺得家姐唔會願意。
點知尋日接老婆放工揸揸吓車老婆同我講話家姐早兩晚同佢講話想我哋幫佢約打針，我話咁奇怪真係估唔到佢自己開聲喎。我老婆話可能佢諗清楚我哋嘅講法，覺得遲早都係要打，就算唔係為啲乜嘢，只係如果想去旅行都一定要打，況且我哋都講過畀佢聽，如果八月底呢個推廣期過咗之後，唔知政府又會諗啲咩方法去為難嗰啲未打針嘅人，再加上襯仲有德國嘅疫苗可以用就自然希望打德國嗰隻。唔知係咪呢啲原因家姐自己諗下諗下覺得都可能咁樣會好啲，所以自己主動同我老婆講話想我哋幫佢約打針。其實自從上一次學校話佢唔夠年紀打，我哋話家姐自己決定之後我哋其實已經再冇跟進，但係家姐可能喺自己冷靜落嚟嘅時候，消化下我哋嘅睇法，又知道我哋唔會迫佢，所以係冇壓力嘅情況之下自己去分析而有咁嘅決定。咁我同家姐講咁不如約埋同我哋一齊我哋打第二針嗰日佢就打第一針啦！家姐話好，因為家姐要完成兩針已經啱啱好差不多8月尾趕得及8月31號之前完成。不過都係咁講啦，雖然家姐自己提出請我哋都幫佢預約咗，但係到時如果佢又係唔願意我哋都係唔會逼佢，總之我哋尊重佢自己決定啦。
有陣時細路仔都有自己嘅諗法，隨著年紀長大，好多時家長嘅角色都開始轉變，開始變成做一個意見提供者，盡量將唔同諗法帶嚟嘅結果話畀佢之，但係到最後要決定嘅都係佢自己，當然有陣時佢哋嘅決定未必同家長嘅意願一樣，但係家長嘅責任只不過係話畀佢聽唔同嘅決定可能會帶嚟唔同嘅影響係啲乜嘢，家長都要尊重細路仔自己嘅諗法，最緊要個細路仔明白佢做呢啲決定之後會有乜嘢結果，做咗決定之後無論結果好定壞都要承擔後果，當然如果嗰啲嘅決定係牽涉到危險或者係會帶嚟一啲佢承受唔到個結果嘅時候，家長有陣時喺必要嘅情況下先至要插手。當細路仔覺得家長係尊重佢哋嘅意願，亦都願意聽佢哋嘅睇法嘅時候，佢哋就會更加容易做出正確嘅決定，亦都更願意同家長一齊去商量點樣處理事情。我成日都講勉強冇幸福，壓迫越大就只有反抗越大，隨住細路仔成長，家長就要越嚟越懂得放手讓佢哋自己做決定，我哋嘅角色只不過係從旁提供意見，提供分析但係最終嘅決定權都應該係喺佢哋自己身上。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
