早兩日參加家姐小學畢業禮，雖然疫情關係要限制參與人數，只能夠畀我老婆入到去睇，而我只能夠喺外面等，但係都總算係可以舉行到畢業禮。睇住呢個小朋友又bb開始眨下眼就已經小學畢業。
望住呢個小朋友又bb開始，好似一舊飯咁乜都唔識到而家已經小學畢業，真係唔敢相信時間可以過得咁快。一路唔想佢大得咁快，但係時間就偏偏唔等人，幸好家姐到而家同我哋嘅關係都仲係好親密，出街佢仲主動會拖住我隻手同埋攬住我，雖然唔願意接受要慢慢放手呢個事實，但係隨住佢一路長大其實都要接受佢慢慢會離開自己身邊。
正正就係啲小朋友大得咁快，佢哋嘅生活習慣同所有嘅嘢其實好快就會成形，所以家長真係要由細個開始培養良好嘅生活習慣，不論品行又好讀書習慣都好，越細個開始培養就越有成效。到小學畢業嘅時候其實好多嘢都已經成曬形要改唔係唔得，但係要花多好多嘅功夫同埋心機，我成日都講小朋友嘅閱讀習慣或者係學習習慣根本就自細要開始培養。正如我個喺band3中學教書嘅朋友講，其實啲細路仔上到去中學，好多嘢根本就好難改到，佢哋成績唔好根本就唔係一朝一夕，好多學習上面嘅習慣根本係家長喺小學嘅時候唔注意唔留心，根本都冇刻意幫佢哋培養，但係上到中學就覺得佢哋成績差，其實到頭來個責任咪又係喺家長度。我相信不論幼稚園，小學或者中學，其實間間學校都係咁樣教個細路仔學習，但係重要嘅就係學校教完之後，家長喺屋企或者放假嘅時候點樣教佢哋呢。生活習慣嘅嘢絕對唔可以係學校講一套，喺屋企就做一套，尤其是喺低班嘅時候。如果家長唔培養佢哋溫習嘅習慣，細路仔係唔會無端端發展出一套習慣。去到中學先至話發覺細路仔成績唔好，先至話又補習或者又做其他嘢其實要花多幾倍心力。如果家長重視細路仔喺細個嘅時候就開始培養佢哋嘅習慣反而到佢哋慢慢長大家長可以就慢慢放手反而會輕鬆一啲。總之細路仔嘅成長過程係快到過咗就追唔返，與其到大個先至開始憂心不如趁細個嘅時候用多啲心機去培養佢哋嘅習慣。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
