家姐升中總算喺剛剛嘅自行派位分配中獲得派位，叫做放下咗心頭大石。但係即將又到另一關開始，因為細佬將會升五年班又到佢開始要預備升中。細佬一向成績都冇家姐咁好，所以對細佬我同老婆都比較擔心。
家姐搵學校嘅時候其實我哋冇乜特別幫佢準備，只係幫下佢手預備面試，其實大部分嘅嘢都係佢自己做自己寫。相反細佬我哋又唔想迫佢令佢壓力太大，所以去到而家呢個階段我哋只係同佢講話如果想同家姐同一間中學讀書嘅話，就要畀啲心機好好準備。因為細佬自細就同家姐一齊讀書而且兩姊弟嘅感情非常之好仲成日一齊講學校嘅嘢，所以希望能夠同家姐一間學校成為佢其中一個推動力好好預備升中。
同家姐嘅最大分別係，我哋預計家姐應該可以透過派位機制可以搵到心儀嘅學校，所以冇特別幫佢報好多直資或者私校，家姐只係報咗一間諗住做後備，所以家姐相對面試嘅次數比較少，連埋自行收生都只係面試咗三次。但係我同老婆都覺得細佬可能喺派位機制入面尤其是係自行收生階段派到嘅機會相對較細，所以已經諗住要幫佢報多幾間直資學校，增加面試嘅機會亦都等佢適應面試嘅方式，到佢去到自行收生階段嘅時候亦都會諗住唔好咁進取，所以由而家開始亦都要同佢做定啲心理準備，等佢慢慢開始要進入狀態，亦都要等佢認識唔同嘅學校同自己嘅能力，到時萬一派唔到同家姐同一間中學嘅時候起碼佢都要接受。所以而家除咗要幫佢預備溫習之外，我哋覺得最重要係要幫佢做心理上面嘅預備，尤其是唔好喺佢面前講邊間學校好，邊間學校唔好，最好佢入到邊間呢一啲嘅說話，只係幫佢盡力去預備。
剛剛先完成家姐嘅階段，緊接又到細佬，可以話係一浪接一浪，不過細佬呢一浪就更加挑戰！不過無點都好，都係要陪佢一齊盡力面對！
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
