早幾日返工行嗰附近啲學校，不論幼稚園定小學都見到好多家長幫啲小朋友喺門口度影相，原來嗰日係啱啱開始復課。望到呢個情景我就諗起阿仔阿女都經歷過，第一日返幼稚園，第一日返小學都仲好深刻印象。正如好多家長一樣我都唔想錯過呢個時刻，專登請假都要陪佢哋一齊返學，同佢哋喺學校門口影張相。嗰晚返到屋企自己都開個電腦再檢查同重温一下佢兩姊弟所有呢啲階段嘅相片我都有影低。對於我嚟講呢啲係小朋友成長重要嘅階段，我都希望陪伴喺佢哋身邊同佢地一齊渡過。
眨下眼阿女今年已六年班就嚟升中一，我嗰日喺度諗到阿女升中一第一日返學嘅時間都唔知仲會唔會肯畀我同佢喺學校門口影張相呢。作為家長當然希望一路陪伴著小朋友長大喺佢哋嘅身邊，但係矛盾地你要接受佢哋一路長大亦要開始慢慢嘗試放手。懂得放手其實都係一種藝術，幾時緊幾時開始放，幾時又要收返緊，我覺得除咗睇細路仔年紀之外亦要睇時機，唔單單只係細路仔去到邊一個年紀你就要放幾多，最重要嘅係家長一路陪伴住喺細路仔側邊一路觀察住去搵合適嘅時機去放。
好記得曾經聽過個講座，講者都話過好多家長以為細路仔由小學升中學，就以為細路仔已經長大，好多嘢可以放手，但係好多時細路仔嘅問題就出現咗喺呢個時間。 所以講者都鼓勵家長喺子女升中開始嘅階段，如果可以嘅都繼續接送放學觀察下仔女嘅情況。其實我都好認同呢個講法，試想像一下其實細路仔由六年班去到中一嘅階段中間嘅過渡期只係兩個月。7月先至係六年班放暑假九月就開學就話係中學生。好多家長聽到中學就覺得已經係另一階段，細路仔已經長大。但係我就覺得兩個月前仲係小學生，兩個月後就變成中學生究竟可以有幾多改變呢！反而我覺得整個升中係需要一個過渡期，呢個過渡期係需要家長細心咁去觀察仔女，亦都要懂得慢慢由五六年班開始逐少逐少放手讓小朋友學習自我管理。 如果唔係冇呢個過渡期突然間由小學生變成中學生好多嘢都要自己處理同安排嘅時候，就好似一個以前冇乜自由嘅人突然間好似多咗好多自由同埋好多時間咁，唔懂得分配就會好容易發生問題。最怕就係有啲家長唔觀察住自己嘅細路當發覺有小問題發生嘅時候唔懂得點樣去修正，唔懂得點樣收返緊少少嘅時候慢慢問題就會由小問題變成大問題。對我嚟講我覺得升中先至係小朋友第一個要經歷最緊要嘅階段，因為佢要由爸爸媽媽身邊嘅小寶貝慢慢過渡去到要控制自己嘅生活控制自己嘅時間同埋做合適嘅決定，所以做父母喺過渡期入面真係要小心觀察從旁指導尤其是要察覺問題嘅發生，千祈唔好以為細路仔升中就會自然長大。點解細路仔有啲會咁懂事能夠咁順利咁過渡呢段時間，好多時其實背後家長都係用咗好多時間同心機去幫助呢啲小朋友去過渡呢一個升中嘅階段。冇嘢係會自然發生㗎，家長用幾多時間用幾多心機，就會造就咗細路仔將來係點樣，由陪伴過渡至自主，呢個過渡期要幾耐，家長應該好好安排同埋小心計劃。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
