疫症停課期間阿仔阿女唔使返學，作為家長都係希望佢哋可以有規律咁學習唔好因為放假放鬆曬。尤其是係阿女已經五年班，所以就更加著緊佢嘅成績。雖然佢哋學校都提供咗啲網上學習嘅練習畀佢哋做，但係都係需要父母 喺身邊協助教佢哋。我講嘅規律唔係話要好似學校咁有一個固定嘅時間表幾點做乜幾點又做乜咁。好似我咁，我就會要阿仔阿女朝頭早食完早餐之後就係開始學習嘅時間，通常都係大約兩個鐘頭嘅學習時間。喺呢兩個鐘頭到主要係做我同老婆畀佢哋嘅練習。除咗溫習返以前嘅嘢之外而家主要係開始幫佢哋預習嚟緊會學嘅嘢。透過做練習可以知道佢哋唔識啲乜嘢要教番佢哋。做完咗我哋畀嘅練習之後佢哋就會做返學校嘅網上練習，通常都係一啲好簡單好快做得完嘅練習，然之後就係練琴同埋睇書。食完晏之後就係佢哋自己玩嘅時間，其實呢兩三個禮拜佢哋係停課期間大致都係咁樣做，希望佢哋都可以有規律咁過每一日。我唔係話學校畀佢哋嘅練習冇用，但始終都係透過網上面學，老師都未必好掌握到佢哋學習嘅進度或者係有乜嘢唔明嘅地方。呢個時候家長就要喺佢哋身邊發揮一個好重要嘅作用。越細個小朋友就越需要家長幫佢哋從細建立學習嘅規律，如果家長唔在意錯過咗建立規律同習慣嘅黃金時間，咁佢哋一路一路長大嘅時候就越難做到。我覺得而家佢哋仲係小學佢啲嘢暫時我都仲可以教到佢哋，但係其實我已經開始逐步放手尤其是呀女，因為到佢中學啲嘢深咗，其實好多時真係要靠佢哋自律同埋佢哋自己建立嘅學習模式。停課不停學其實真係唔係講咁易。
另外喺呢段疫情期間，我真係覺得好需要教啲細路仔公德心同埋衛生常識，每一日不論新聞又好網上啲社交平台都好。都會見到好多冇公德心嘅事。做家長千祈唔好以為呢啲係小事，其實正正就要透過呢啲所謂小事教自己嘅細路仔做個有公德心嘅人。做家長就更加要做好榜樣以身作則，唔係嘅話我哋個社會只會變得越嚟越差 越嚟越唔健康。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
