我阿女呀有陣時做嘢都係比較執著，好有自己諗法，明明有陣時見到有啲嘢嘅做法可以好啲提醒佢，但係佢就會覺得佢自己用緊嗰套方法冇問題，所以有陣時有啲嘢想佢改都會用好多時間等佢慢慢接受。因為唔想破壞大家之間嘅關係，如果嗰啲嘅錯誤只係令佢行遠咗少少 冇乜太大影響一般我都唔會堅持由得佢繼續。其實好多時我哋大人想啲細路仔跟自己嘅方法做，都係因為想佢慳啲時間唔使行咁多冤枉路。又或者覺得大人講嘅嘢就係啱細路仔一定要跟住做，如果細路仔唔係咁諗，有陣時就會產生好多磨擦，咁當然最後可能都係家長會贏，但係就可能破壞咗大家嘅關係。所以我覺得有陣時唔需要太執著，除非有啲乜嘢生命危險或者大件事，如果唔係畀佢按照自己嘅方法去做，到佢覺得有需要佢自然會改。所以阿仔阿女而家都會知道如果我同老婆都堅持要佢做嘅嘢，其實都一定係對佢哋有好大影響，所以大部分時間佢係都會跟住做。
我同阿仔阿女成日都會打羽毛球，由於我自細都已經打波，讀書嘅時候仲係球隊，所以有時見到阿仔阿女打波動作上面有啲乜嘢毛病都會出下聲。不過有陣時可能我太堅持或者好似教練上身咁，有陣時打波可能會打得唔係幾開心，所以而家我都要提醒自己唔好咁緊張，雖然係想佢哋打得好啲，但係教佢嘅責任就交番畀教練我就同佢哋玩。
其實一路都覺得阿家姐打波喺個動作上面有啲需要改善嘅地方，有陣時提醒家姐，但係佢總係覺得冇問題，但係個動作唔改就會變成壞習慣，但係家姐就唔係好在意。直至上星期，練完波之後佢同我講話隻腳大腿前面嘅肌肉有啲痛，唔知點解個腦突然間叮一聲，諗一諗就同佢講，因為佢隻腳嘅動作錯咗所以令到唔應該痛嘅地方就變咗開始有啲痛，仲做埋畀佢睇話畀佢聽做乜會引致咁痛。佢聽完又覺得好似好有道理。到第二日我同佢打波，我就提醒佢個動作可以點樣改善可以唔令到隻腳痛，我仲話畀佢聽之前我提過佢，但佢覺得唔重要但係而家身體話畀佢聽，原來佢個動作真係錯咗令到啲肌肉痛，所以要留心改返啱個動作。我同佢打嘅時候今次佢真係好在意改個動作，每一次打完一球佢都會望下自己嗰隻腳嘅位置 有冇錯，今次打完波之後我問佢隻腳仲有冇痛，佢又話冇咁痛，其實我覺得佢係心理作用就真。但係我就同佢講話今次個身體又話返畀佢聽你做啱咗個動作所以隻腳就冇咁痛喇。
之前間中提佢佢都唔在意去改，但係今次因為隻腳有少少痛佢自己覺得有需要佢就好在意去改。其實呢個就正正係細路仔學嘢嘅方式，如果佢覺得有需要，佢就會好在意。之前其實我同教練都有提過佢，但係佢都唔係好在意。今次正正就係佢覺得連自己個身體話畀佢聽佢需要，所以佢就在意去改。另外好似我之前講過，我個女做數學有陣時都幾唔小心，但係佢就依賴我同我老婆會幫佢睇功課，所以佢第一次做嘅時候都唔係好在意只求快做完，直至到有一次佢考試嘅時候，明明可以攞到好高分但係就係因為唔小心，終於攞到佢讀書以嚟最低嘅分數嗰次之後佢就真係做得好小心。
有陣時家長可以諗下喺細路仔喺學習上面可唔可以製造一啲需要畀佢哋，令佢哋覺得嗰樣嘢重要同埋有需要，咁學起上嚟就會得心應手一啲，同埋佢哋亦都會在意啲。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
