我個仔有個我覺得好奇怪嘅習慣，就係佢好鍾意成日問我鍾意乜嘢鍾意邊樣多啲或者邊樣靚啲。例如佢鍾意睇幪面超人，佢就成日問我鍾意邊個幪面超人多啲。除咗鍾意啲乜嘢邊啲靚啲之外，佢揀咗啲乜嘢之後，佢都會問我鍾意邊樣多啲。佢又好鍾意成日都問同一個問題可以問好多次。後來我發覺，原來佢係想我認同佢揀嗰樣嘢，所以佢好鍾意問究竟我鍾意邊樣多啲，其實佢就係想我揀佢揀嗰啲或者佢鍾意嗰樣嘢。
我發覺我個仔好需要我哋嘅認同，尤其是係爸爸，佢每次聽到我揀嘅嘢同佢揀嘅一樣佢就會好開心，但係唔代表佢唔會再問，可能隔一段時間佢又要重新再問過，好似想證實我真係同佢鍾意同一樣嘢咁。喺呢樣嘢上邊，唔知點解媽媽的影響力好似冇咁大，雖然佢間唔中都會問媽媽，但係我發覺佢問我嘅次數多好多，可能喺呢個時間嘅細路仔尤其是係男仔，佢好想喺爸爸身上搵到認同，從爸爸身上搵到認同從而建立自信心。我之前都講過我個仔 有選擇困難症，成日揀嘢都係左揀右揀，連佢自己都話自己有選擇困難症。 佢好多時都會問我哋揀邊樣好啲，佢就係唔信自己嘅眼光。所以我漸漸發覺 無論佢揀咗乜嘢只要你開始認同佢，咁佢慢慢就會相信自己所揀嘅嘢係啱嘅。呢個方法開始用喺建立我個仔自信上面其實好有用，我仔有陣時做嘢冇乜自信，好鍾意問我哋做成點做成點，只要我俾到足夠嘅認同支持佢，佢就會越嚟越有信心。咁當然唔係盲目地佢做親乜嘢都話佢啱，係適當地認同佢嘅選擇縱使有陣時佢揀嘅嘢未必係我鍾意嘅，但係為咗建立佢嘅自信，有陣時都會認同佢等佢安樂啲 亦都會相信自己嘅眼光。
唔知係咪男仔同女仔係同一個年紀有啲唔同，我發覺我個仔明顯係畀家姐多咗需要我嘅認同。只要佢唔係做錯事或者做到一啲有危險嘅事，好多時我都會尊重佢嘅選擇，等佢慢慢建立自信同相信自己，而且等佢完成咗啲事嘅時候適當嘅讚賞同埋認同亦都係幫助佢建立自信心重要嘅步驟。喺我個仔呢個年紀嘅時候喺父母身上尋找認同，建立自信到佢大啲去到青春期嘅時候，佢就會開始喺佢嘅朋友身上尋找認同，只要我哋而家喺呢個階段慢慢幫佢建立自信，令佢相信自己，到佢大啲嘅時候就會介咁容易隨波逐流，咁容易受朋友影響，因為每個人都需要尋求認同，當佢唔能夠喺家人身上搵到認同嘅時候，最終佢就會尋求朋友 或者其他人嘅認同。如果佢身邊嘅朋友都係正當同生活健康嘅朋友當然冇問題啦！我哋唔係未曾見過 啲十一二歲嘅細路係街擔住支煙粗口爛舌聯群結黨，我相信呢啲一定唔係父母教嘅，但係當佢係呢一個圈子入面識到呢一種朋友，要尋求認同咁咪就係唯有同佢哋一樣。所以我開頭都覺得我個仔成日問問題有啲煩，但係諗深一層如果喺呢個階段我哋幫佢搵到正確嘅身份認同 ，建立到一個健康嘅生活模式。咁其實到佢大啲 我哋又少啲擔心佢會群到一啲我哋唔想佢群嘅朋友 ，為咗尋求認同做一啲我哋唔想做唔想佢做嘅事。 所以喺細路仔細個 開始我哋就要幫佢慢慢建立自信慢慢建立認同感。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
