睇新聞睇到話喺呢段疫程期間，因為啲人留咗喺屋企嘅時間多咗好多，所以發生家暴嘅情況嚴重咗好多。其實都好容易理解， 香港人普遍住嘅地方都唔大，成家人成日鬱喺屋企大家又唔係好溝通，再加上因為多咗時間對住，自然睇唔順眼嘅嘢就多咗，如果唔識控制情緒又唔識溝通嘅話就好容易產生問題。但係點樣都好都唔應該用暴力解決問題，與其咁多睇唔順眼，不如學下點樣互相欣賞吧。點解呢樣嘢咁困難？就係因為平時大家冇在意去做，亦都真係冇好好諗下相處嘅問題，因為平時大家都各有各忙喺屋企嘅時間唔多， 就算返到屋企可能都係各自對住部手機，一係自做自己嘢，就算唔順眼都唔係成日見到，問題自然冇咁嚴重。而家咁多時間要因埋一間屋入面問題自然浮現。與其日日互相埋怨 ，不如學下點樣相處學下點樣互相欣賞。同伴侶可以諗返當初大家點樣一齊，仔女就要發掘佢哋嘅長處。
我哋屋企近排就多咗好多成家人合作一齊做嘅嘢。我同啲細路就成日一齊砌模型，唔好諗住阿女唔鍾意，原來只要一齊玩玩得開心佢都會一齊。有陣時又會一齊合作打下遊戲機 唔係各自玩，係一齊玩， 當大家變成玩伴自然感情就會越嚟越好，不過當然做家長嘅就要控制打機嘅時間啦，都係淨係星期六日，每次都係玩最多兩個鐘頭。我老婆以前冇時間，近排就多咗好多時間學煮嘢食，又係每嘗試次去煮，阿仔阿女就會成家總動員一齊幫手，有陣時蛋糕有陣時麵包又會有陣時係蛋撻，但係總之整乜嘢阿仔阿女都會主動埋去一齊幫手，嘻嘻哈哈咁又幾個鐘頭。有陣時又會一齊睇啲教煮嘢食嘅片段，然後一齊硏究。
其實透過一齊參與一齊合作真係有好多好處。除咗好老土咁講，可以建立更加緊密嘅關係之外，透過合作又可以學接受大家嘅意見，又可以互相欣賞， 最重要係因為件成品，大家都係啱啱學，做得好唔好都唔係咁大問題，最重要都係過程。而做完之後又可以大家一齊享受個成果，又可以大家傾下有邊度可以做好啲，成件事可以係享受個過程多個成果。
與其多咗時間係屋企各自對住部手機各自做自己嘢，就算人喺埋一齊個心都唔喺埋一齊嘅話。家長不如嘗試放開一啲，行多一步嘗試諗啲嘢同啲仔女或者成家人一齊合作去做。做啲無關重要嘅嘢， 其實可以係建立大家共同目標嘅第一步。多咗時間喺屋企可以係令大家產生磨擦多咗嘅危機，但另一方面亦都可以係大家學習建立關係嘅機會。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
