好耐冇同朋友聚會，早兩日去咗個好熟嘅朋友屋企食飯，佢兩夫婦有個仔。嗰晚食完飯佢個仔同我對仔女喺房玩，咁我哋四個人喺廳就傾下偈當然都離唔開會講下湊仔經。佢老婆就話佢個仔越大就越似個老豆，連啲性格都差唔多一樣。當然有好有唔好，其中佢兩公婆都覺得佢個仔越嚟越大脾氣越嚟越冇耐性。當然呢個性格，爸爸梗係話唔係似佢唔係喺佢度學返嚟啦。但係講真我同佢兩公婆咁熟點會唔知道其實個爸爸有陣時都真係幾大脾氣，我哋都見過佢鬧仔，有陣時其實唔係好大件事，但係都鬧得好緊要。 我呢個朋友除此之外其實佢對朋友真係幾好，當朋友有嘢需要幫忙嘅時候佢一定義不容辭。
講真細路仔其實就係家長嘅一面鏡，無論你願唔願意面對都好，細路仔嘅性格其實就係反映緊家長嘅性格。家長好多時唔鍾意細路仔嘅性格，成日會覺得佢哋呢樣唔好嗰樣唔好， 但係好少會反省下其實佢哋嘅呢啲性格係邊度學返嚟。好多時家長唔接受自己啲仔女有一啲唔係咁好嘅性格，會成日話啲細路仔呢樣，話啲細路仔嗰樣，但係另一方面呢啲家長就要人哋接受佢哋自己都有嘅呢一啲性格。好似遲到呢種性格咁，家長成日唔鍾意啲細路呢樣又遲嗰樣又遲，但係其實好多時都係喺細路仔好細個嘅時候，家長自己都唔在意守時，所以養成到細路仔都有唔守時嘅習慣。又好似冇耐性同忟憎呢啲性格咁，好多時都係家長教仔嘅時候，不經意咁顯露出嚟，細路仔就有樣學樣。家長唔鍾意自己嘅細路仔懶懶閒冇時間觀念，但係就要人哋容忍佢哋自己遲到嘅習慣，呢啲家長有陣時會為自己嘅遲到搵唔同嘅理由去解釋，但係 就係唔接受自己仔女嘅遲到。
總之細路仔自細性格嘅發展，其實就係喺家長身上學返嚟，好嘅性格又好差嘅性格又好其實都係源自於家長。中國人成日都有句說話虎父無犬子或者有其父必有其子，其實就係講緊呢一面鏡。當然家長就梗係接受好嘅嘢啦，但係對於細路仔唔好嘅嘢性格，唔好話承認其實係源自於家長自己，甚至連反省吓點解小朋友會咁都好少。家長應該要細心留意呢一面鏡，想教好自己嘅細路仔就要時常反省下自己性格上面嘅缺點，而呢啲缺點究竟對細路仔有乜嘢影響。 諗起以前聽過一句佛偈［本來無一物，何處惹塵埃］，細路仔心中嘅呢一面鏡上嗰啲塵埃究竟喺邊度嚟呢？
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
