呢輪教緊阿女做高一班嘅數學，唔知點解可能好多家長都遇到過教教吓自己都就會越嚟越忟憎好容易越講越大聲，有陣時家姐 都會畀我教導想喊咁。其實當自己冷靜落嚟諗都會知道唔應該咁忟憎，不過可能有陣時就硬係覺得啲嘢細家姐應該要識但係佢又做錯，講極佢又好似唔係好明咁，所以越講就會越忟憎。
自己都明白而家啲嘢對家姐嚟講係深咗，同埋佢未學唔可以要求咁高。而家通常都係前一晚我畀定幾題數家姐做，等家姐第二日放學返嚟做完之後夜晚返嚟我就會幫佢對同埋教番佢點做。家姐好多時都未必會全部做啱曬好多時都有錯，之前家姐一聽到要埋枱預備改正同埋教番佢點做佢就開始有啲擔心個樣仲有啲驚咁，所以近呢幾次一埋枱預備教佢功課嘅時候我都一定提醒自己唔好忟憎慢慢嚟，試過有一次家姐全部做錯曬，其實一路對答案我一路已經嬲嬲哋！家姐見到我個樣佢都即刻變曬聽，到我一開始問佢啲嘢點解嘅時候，佢就開始已經流眼淚。但嗰次我即刻同自己講唔好嬲唔好惡溫柔啲慢慢嚟。反而慢慢解釋畀家姐聽，其實我預咗佢錯，因為啲嘢佢未學過，我重視嘅係佢有冇詳細寫啲步驟出嚟畀我知道佢錯啲乜嘢，我同佢講佢唔識我係唔會鬧佢，亦都唔會唔鍾意，因為真係預咗佢唔識同啲嘢對佢嚟講係新嘅。 咁講完佢又真係好似即刻放心曬，仲開始同我有問有答，嗰次雖然佢都係做錯曬啲數，但係教佢嘅時候個氣氛就變得好好多。 我成日同佢強調我重視嘅唔係佢啱幾多，而係佢明唔明白同埋就算錯咗佢識唔識得改正。
我越嚟越覺得教功課係真係要搵到同埋配合到細路仔嘅節奏，好多時都係家長嘅期望同埋細路嘅能力唔配合，好多時出問題其實係家長太過心急配合唔到細路仔學習嘅節奏。好似我教家姐做數咁，好多時用一個方法教佢教極佢都唔明，反而試下換另一個教法用另外一個方式去解，可能佢又會容易啲明白。發脾氣忟憎心急係唔會令到個細路仔學得快咗 ，但係如果我哋識得諗下其他唔同嘅方法或者將個步伐放慢啲，反而可能細路仔會容易啲學到亦都唔會令佢哋怕咗學習。道理好似好簡單，個個家長都應該明，但真係唔容易做到。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
