上星期阿仔阿女終於考完試，呢個禮拜佢哋開始派卷，其實佢哋都幾緊張。我覺得佢哋都幾緊張自己嘅成績，因為佢哋有個習慣就係一派咗卷如果佢哋覺得自己考得好，佢哋一番屋企就會即刻打電話畀我要我估下佢哋考成點，所以通常佢哋打電話嚟我都估到佢嗰科應該佢哋覺得考得唔差。佢哋學校嘅試卷唔比拎返屋企，所以有陣時想知道佢哋其實邊啲部分做得好邊啲部份分做得唔好，有陣時都唔係咁清楚。
記得我以前細個我爸爸媽媽最緊張就係我考幾多分 ，通常考到九字頭就覺得冇問題，如果少個九字頭就會話考得差亦都有機會畀佢哋鬧。今時今日到自己做家長當然明白嗰種自己溫咗習但係都畀人話嘅感覺唔好受，所以我會提醒自己唔好淨係睇分數。返到屋企阿女通常都會好開心咁再講佢考試考成點，但係明顯就見到阿仔有陣時對有啲科目冇乜信心，驚自己個分數達唔到我哋嘅要求，所以佢又唔係好主動咁講通常都要我再問。我覺得阿仔會咁係因為佢驚我哋淨係會睇佢嘅成績，所以每一次佢哋同我講分數嘅時候，我都唔會只係強調佢哋攞幾多分亦都冇定低要考幾多分我哋先至滿意，而係我哋要睇佢究竟呢次嘅溫習 攞呢個分數合唔合理。當然係父母都想阿仔阿女次次攞100分或者個九字頭，但係其實分數唔代表一切，我覺得重要嘅係佢哋有冇溫習同埋個溫習方法啱唔啱。另外亦要睇佢哋有冇進步，如果我哋每一次都淨係睇分數，我就覺得會好似重覆返我自己做細路嘅時候咁，每一次派卷都會驚達唔到呀爸爸媽媽嘅要求返到屋企會畀人鬧，但係明明我有溫習 咁樣其實我好唔開心，到而家大咗諗返轉頭其實嗰陣時都幾失望同埋沮喪。我唔想我對仔女都有呢啲感受。所以我一定唔會淨係睇分數反而會睇佢哋有冇進步亦都會同佢哋分析返今次嘅溫習有冇啲咩唔足夠或者有啲咩做得好嘅地方導致到佢哋攞呢個分數。
到去學校睇卷嘅時候，真正睇到佢哋考成點。揸住份卷做家長搵錯處好容易，因為好容易睇到佢有咩錯，但係我覺得更加重要嘅係要雞蛋裏挑骨頭係要挑啲好嘅骨頭出嚟搵佢有咩地方係做得進步咗或者做得好咗佢地方，然之後再同佢諗返佢溫習時候做嘅嘢，加強佢哋做得好嘅地方。我成日都覺得佢做得唔好嘅你鬧十次佢都未必會改善。但係佢哋做得好我哋忽略嘅話。慢慢可能就連佢做得好嘅地方佢哋都會因為冇人讚賞或者冇人留意而唔再留心去做。好似我個仔咁今次考試有啲科嘅成績係明顯進步咗，雖然都未曾去到九字頭，但係我都要畀我個仔知道其實我哋係滿意佢嘅進步亦都滿意佢嘅溫習方法希望佢下次繼續努力。要小朋友改善佢哋做得唔好嘅地方，佢需要嘅係父母留心到佢哋喺改羔咗嘅時候即時給與嘅讚賞。小朋友需要正面嘅回饋，所以做家長要雞蛋裏挑骨頭係好容易因為挑錯處，但係如果要你喺雞蛋入面挑啲好嘅骨頭出嚟，要搵到佢哋做得好嘅地方知後俾回饋其實並唔係咁易，但係偏偏細路仔就係需要我哋搵到呢啲佢哋做得好嘅地方讚賞咁佢哋先至會有信心繼續做落去。 有好多細路仔都會話我哋啲大人成日雞蛋裏挑骨頭， 我覺得我哋要繼續挑骨頭但係唔係要挑剔錯處，要係要搵啲佢哋做得好嘅地方。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
