有冇諗過究竟自己嘅仔女 點樣睇自己嘅呢？即係究竟細路仔心目中嘅自己究係一個點樣嘅人呢。我越嚟越相信其實細路仔點睇自己好多時都係嚟自父母把口。即係話愈細個嘅小朋友佢要建立自己嘅自我形象其實就越靠父母把口，究竟佢係父母口中係一個點樣嘅小朋友，佢自己就會覺得自己係一個點樣嘅小朋友。
好似我自己個仔咁，我曾經見過佢做一張工作紙， 佢老師問佢覺得自己係一個點樣嘅小朋友，即係點形容自己。我個仔係話自己係一個冇記性，但係好有禮貌同好整齊嘅小朋友。嗰次我問佢點解會咁樣覺得，佢好簡單咁答我哋原來就係因為我哋成日咁話佢囉！咁諗下又真係喎，我老婆成日幫呀仔涅默書，但係呀仔通常都要默幾次先至默到，溫習嘅期間我老婆成日都話佢冇記性。但係另一方面我佢又的確比家姐整齊好多。 因為我哋成日都會讚佢話佢好有手尾啲嘢執得好整齊，相比起家姐，家姐就真係比較隨意。
其實之前都曾經聽過有人講話父母嘅説話係成就緊自己嘅仔女。嗰陣時都冇乜留心，但係當自己做咗父母之後就明白要更加小心自己嘅說話。越細個嘅小朋友當佢要建立自我形象嘅時候，其實真係好靠父母把口究竟點樣話佢，佢嘅自我形象好大部分就係嚟自父母嘅口中。如果係父母嘅口中成日都出咗好多負面嘅說話同負面嘅形容，咁喺仔女嘅心入面慢慢就對自己建立一啲負面嘅形象，覺得自己唔及人或者覺得自己樣樣都做得唔好。我唔係話父母成日話佢叻話佢聰明，咁個細路仔就一定會成功，唔係明明佢做錯我哋都要讚佢，話佢做得好咁佢就會成功。 而係我覺得我哋要留心佢哋正確嘅行為，加強佢哋建立呢啲行為嘅習慣，慢慢幫佢建立自我嘅正面形象。做父母唔好以為我哋把口講嘅說話啲仔女成日當耳邊風，相反尤其是細個嘅小朋友佢哋係非常之重視父母所講嘅每一句說話，尤其是係關係到佢哋嘅自我形象，所以我覺得我哋有陣時講說話真係要非常小心。因為鬧人好容易就會講得過份咗講得多咗，但係當我哋鬧人嘅時候往往我哋唔會察覺到呢啲嘅說話可能對仔女嘅傷害，但係慢慢日子耐咗，經常出現嘅呢啲嘅負面說話慢慢就會喺仔女嘅心目中建立咗一套負面嘅形象，其實對仔女嘅成長都唔係一個健康嘅影響。所以我覺得做父母有陣時真係要控制自己嘅情緒要冷靜自己，就算要鬧人都要諗清楚自己講嘅說話。我經常都會提醒自己，我對仔女嘅自我形象好多時都係嚟自我哋把口嘅說話。幫助仔女建立一個健康正面嘅形象，就由父母自己口中嘅說話開始。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
